Land Acquisition Act: 117 વર્ષ જૂનો કાયદો બદલાશે! કેન્દ્ર સરકાર લાવશે ડિજિટલ યુગમાં મિલકત નોંધણીનું નવું બિલ

Land Acquisition Act: ડિજિટલ યુગમાં જમીન અને મિલકતના ખરીદ-વેચાણની પ્રક્રિયાને વધુ સરળ, પારદર્શક અને સુરક્ષિત બનાવવા માટે કેન્દ્ર સરકાર એક મહત્ત્વપૂર્ણ બિલ લાવવાની તૈયારી કરી રહી છે. આ બિલ 117 વર્ષ જૂના નોંધણી કાયદાને રિપ્લેસ કરશે અને ઓનલાઈન નોંધણી, આધાર-આધારિત ચકાસણી અને ડિજિટલ રેકોર્ડ જેવી આધુનિક સુવિધાઓ રજૂ કરશે. ગ્રામીણ વિકાસ મંત્રાલય હેઠળના જમીન સંસાધન વિભાગે આ ડ્રાફ્ટ બિલ જાહેર કર્યું છે અને લોકો પાસેથી સૂચનો માંગ્યા છે.

શું છે નવું બિલ?

આ બિલ મિલકતની નોંધણી પ્રક્રિયાને ડિજિટલ પ્લેટફોર્મ પર લઈ જશે, જેનાથી લોકો ઘરે બેઠા દસ્તાવેજો સબમિટ કરી શકશે. નવા કાયદામાં એગ્રીમેન્ટ ટુ સેલ, પાવર ઓફ એટર્ની, વેચાણ પ્રમાણપત્ર અને ગીરો જેવા ડોક્યુમેન્ટ્સની નોંધણી ફરજિયાત રહેશે. આ ઉપરાંત, ડિજિટલ રેકોર્ડ અને ઈલેક્ટ્રોનિક સર્ટિફિકેટ્સની સુવિધા પણ શરૂ થશે, જે પ્રક્રિયાને વધુ ઝડપી અને કાર્યક્ષમ બનાવશે.

આધાર-આધારિત ચકાસણીથી રોકાશે ફ્રોડ

છેતરપિંડી અટકાવવા માટે સરકારે આધાર-આધારિત ઓથેન્ટિકેશન સિસ્ટમનો પ્રસ્તાવ મૂક્યો છે. આ સિસ્ટમમાં વ્યક્તિની સંમતિ ફરજિયાત રહેશે. જો કોઈ વ્યક્તિ આધાર ડિટેલ્સ શેર ન કરવા માંગે, તો તેમના માટે અન્ય વેરિફિકેશન ઓપ્શન્સ પણ ઉપલબ્ધ રહેશે. આધાર ચકાસણીથી ખોટા ડોક્યુમેન્ટ્સ અને ફ્રોડની શક્યતા ઘટશે, જેનાથી મિલકતના વ્યવહારો વધુ વિશ્વસનીય બનશે.

ડિજિટલ રેકોર્ડ અને એજન્સીઓ સાથે કનેક્ટિવિટી

આ બિલ ડિજિટલ રેકોર્ડ-કીપિંગને પ્રોત્સાહન આપશે અને નોંધણી પ્રક્રિયાને અન્ય રેકોર્ડ-કીપિંગ એજન્સીઓ સાથે લિંક કરશે. આનાથી માહિતીની આપ-લે સરળ બનશે અને પ્રક્રિયામાં પારદર્શિતા વધશે. ઉદાહરણ તરીકે, જમીનના રેકોર્ડ અને નોંધણી ડેટા એકબીજા સાથે સિંક્રનાઈઝ થઈ શકશે, જેનાથી ડોક્યુમેન્ટ વેરિફિકેશન ઝડપી થશે.