ફ્રાન્સમાં UPIનો ડંકો: ભારતીય પ્રવાસીઓની સંખ્યામાં 40%નો ઉછાળો

France Indian tourists: ફ્રાન્સમાં ભારતની યૂનિફાઈડ પેમેન્ટ્સ ઈન્ટરફેસ (UPI) સર્વિસએ ધૂમ મચાવી છે. આ સર્વિસને કારણે ફ્રાન્સમાં ભારતીય પ્રવાસીઓની સંખ્યામાં 40%નો નોંધપાત્ર વધારો થયો છે. લાયરા નેટવર્કના ચેરમેન ક્રિસ્ટોફી મેરિયટે જણાવ્યું કે, એફિલ ટાવર જેવા પોપ્યુલર સ્થળોએ UPIની સુવિધા શરૂ થવાથી ભારતીય પ્રવાસીઓ હવે સરળતાથી ડિજિટલ પેમેન્ટ કરી શકે છે. આનાથી તેમને સુરક્ષિત અને સુવિધાજનક એક્સપિરિયન્સ મળી રહ્યો છે.

એફિલ ટાવર પર UPIની સફળતા

ગ્લોબલ ફિનટેક ફેસ્ટ 2025 દરમિયાન મેરિયટે જણાવ્યું કે, એક વર્ષ પહેલાં એફિલ ટાવર પર UPI સર્વિસ શરૂ કરવામાં આવી હતી. આ સર્વિસ ખૂબ જ સફળ રહી છે. એફિલ ટાવરના મહાપ્રબંધકના જણાવ્યા અનુસાર, આ સર્વિસને કારણે ભારતીય પ્રવાસીઓની સંખ્યામાં 40%નો વધારો થયો છે. UPIની સૌથી મોટી ખાસિયત એ છે કે તેમાં ખર્ચની રકમ સીધી ભારતીય રૂપિયામાં દેખાય છે, અને એ જ રકમ પ્રવાસીના ખાતામાંથી કપાય છે. આ ભારતીય પ્રવાસીઓ માટે સુરક્ષિત અને પારદર્શક પેમેન્ટનો વિકલ્પ છે.

લાયરા નેટવર્કનું યોગદાન

લાયરા નેટવર્ક ભારતમાં 18 વર્ષથી વધુ સમયથી કામ કરી રહ્યું છે અને ભારતના મોટી બેંકો સાથે સહયોગ કરે છે. તેને ભારતીય રિઝર્વ બેંક (RBI) તરફથી પેમેન્ટ એગ્રીગેટરનું લાઇસન્સ પણ મળેલું છે. મેરિયટે જણાવ્યું કે, UPIનો ઉપયોગ ભારતમાં સતત વધી રહ્યો છે, અને તેનો વૈશ્વિક સ્તરે પણ પ્રભાવ વધી રહ્યો છે.

બાયસેસ્ટર વિલેજમાં UPIનો વિસ્તાર

મેરિયટે એ પણ જાહેર કર્યું કે, ટૂંક સમયમાં બાયસેસ્ટર વિલેજમાં પણ UPIથી પેમેન્ટ શરૂ થશે, જેની શરૂઆત ફ્રાન્સના લા વેલી વિલેજથી થશે. બાયસેસ્ટર વિલેજ, જે ઇંગ્લેન્ડના ઓક્સફોર્ડશાયરમાં આવેલું ડિઝાઇનર આઉટલેટ શોપિંગ સેન્ટર છે, ભારતીય પ્રવાસીઓમાં પોપ્યુલર છે. આ સ્થળ ખાસ કરીને લક્ઝરી શોપિંગ અને ડિસ્કાઉન્ટની સુવિધા આપે છે, જે ભારતીય પ્રવાસીઓને આકર્ષે છે.