અમેરિકાના ઝટકા બાદ ભારતે યુરોપમાં જમાવ્યો પગદંડો: સ્પેન અને જર્મનીમાં નિકાસમાં રેકોર્ડબ્રેક વધારો, જાણો શું કહે છે આંકડા

India Export News: જ્યારે એક દરવાજો બંધ થાય છે, ત્યારે બીજો ખુલે છે. આ કહેવત ભારતીય નિકાસકારો માટે હાલમાં એકદમ સાચી સાબિત થઈ રહી છે. અમેરિકા દ્વારા ભારતીય સામાન પર ભારે ટેક્સ લાદવામાં આવ્યો હતો, જેના કારણે વેપારીઓને ચિંતા હતી. પરંતુ, ભારતીય નિકાસકારોએ હાર માનવાને બદલે નવા બજારો શોધવાનું શરૂ કર્યું અને તેમને યુરોપમાં જબરદસ્ત સફળતા મળી છે. વાણિજ્ય મંત્રાલયના તાજેતરના આંકડા મુજબ, યુરોપના દેશોમાં ભારતીય વસ્તુઓની માંગમાં મોટો ઉછાળો આવ્યો છે. ખાસ કરીને સ્પેન, જર્મની, બેલ્જિયમ અને પોલેન્ડ ભારતીય સામાન માટે હોટ ફેવરિટ ડેસ્ટિનેશન બની રહ્યા છે.

સ્પેન બન્યું ભારતનું નવું ગ્રોથ એન્જિન

આંકડાઓ પર નજર કરીએ તો, સ્પેન ભારતીય નિકાસ માટે સૌથી ઝડપથી વિકસતું માર્કેટ બનીને ઉભરી આવ્યું છે. ચાલુ નાણાકીય વર્ષમાં એપ્રિલથી નવેમ્બર મહિના દરમિયાન સ્પેનમાં થતી નિકાસમાં 56% નો જંગી વધારો જોવા મળ્યો છે. ગયા વર્ષે આ સમયગાળામાં ભારતની સ્પેન ખાતેની નિકાસ 3 અબજ ડોલર હતી. જે વધીને આ વર્ષે 4.7 અબજ ડોલર પર પહોંચી ગઈ છે. ભારતની કુલ નિકાસમાં સ્પેનનો હિસ્સો વધીને 2.4% થઈ ગયો છે, જેમાં સીધો 0.5% નો વધારો નોંધાયો છે.

જર્મનીમાં પણ ભારતની મજબૂત પકડ માત્ર સ્પેન જ નહીં, પરંતુ યુરોપની આર્થિક મહાસત્તા ગણાતા જર્મનીમાં પણ ભારતીય સામાનની માંગ અકબંધ છે. ચાલુ નાણાકીય વર્ષના શરૂઆતી 8 મહિનામાં જર્મનીમાં ભારતની નિકાસ 9.3% વધી છે.

નિકાસનો આંકડો 6.8 અબજ ડોલરથી વધીને 7.5 અબજ ડોલર થયો છે. એક અધિકારીના જણાવ્યા મુજબ, ભારતની કુલ નિકાસમાં જર્મનીનો હિસ્સો 2.6% છે. આ દર્શાવે છે કે જર્મની ભારતીય ઉત્પાદનો માટે એક ભરોસાપાત્ર અને સ્થિર બજાર છે.

બેલ્જિયમ અને પોલેન્ડમાં પણ સારા દિવસો

યુરોપના અન્ય દેશો જેમ કે બેલ્જિયમ અને પોલેન્ડમાં પણ ભારતીય વેપારીઓનો દબદબો વધી રહ્યો છે.