એપ્રિલ-જૂનમાં ભારતે 9.74 લાખ ટન DAPની કરી આયાત, મંત્રીએ સંસદમાં આપી માહિતી

દેશની સ્થાનિક માંગને પહોંચી વળવા માટે ભારતે એપ્રિલથી જૂન ક્વાર્ટરમાં લગભગ 9.74 લાખ ટન ડાય-એમોનિયમ ફોસ્ફેટ (DAP) ની આયાત કરી છે. આ માહિતી રસાયણ અને ખાતર રાજ્યમંત્રી અનુપ્રિયા પટેલે મંગળવારે રાજ્યસભામાં આપી હતી. PTI ના સમાચાર અનુસાર, એપ્રિલમાં 2.89 લાખ ટન, મેમાં 2.36 લાખ ટન અને જૂનમાં 4.49 લાખ ટન DAP ની આયાત કરવામાં આવી હતી. સરકારી ડેટા અનુસાર, નાણાકીય વર્ષ 2024-25માં ડીએપીની આયાત 45.69 લાખ ટન હતી, જ્યારે 2023-24માં તે 55.67 લાખ ટન, 2022-23માં 65.83 લાખ ટન, 2021-23માં 54.62 લાખ ટન અને 2021-24માં લાખ ટન હતી.

ખાતરોની માંગ ગત વર્ષ કરતાં થોડી વધારે

સમાચાર અનુસાર, રાજ્યમંત્રી અનુપ્રિયા પટેલે જણાવ્યું હતું કે સરકાર ખરીફ 2025ની જરૂરિયાતોને પહોંચી વળવા માટે પૂરતા પ્રમાણમાં ખાતરોની ઉપલબ્ધતા સુનિશ્ચિત કરી રહી છે. આ ખરીફ સિઝન માટે ખાતરોની માંગ ગયા વર્ષ કરતાં થોડી વધારે છે, કારણ કે પાકનો વાવણી વિસ્તાર વધ્યો છે અને ચોમાસું અનુકૂળ રહ્યું છે.

પટેલે જણાવ્યું હતું કે એપ્રિલ 2010 થી કેન્દ્ર સરકારે ફોસ્ફેટિક અને પોટાસિક ખાતરો માટે પોષક તત્ત્વો આધારિત સબસિડી નીતિ અમલમાં મૂકી છે. આ નીતિ હેઠળ, પોષક તત્વોની માત્રાના આધારે સબસિડી નક્કી કરવામાં આવે છે અને આ ખાતરો ઓપન જનરલ લાઇસન્સ હેઠળ આવે છે, જેનાથી કંપનીઓ તેમના વ્યવસાય મુજબ આયાત કરી શકે છે.

સતત પુરવઠો કરાઈ રહ્યો છે સુનિશ્ચિત

તેમણે કહ્યું કે દેશમાં ખાતરની માંગ અને ઉત્પાદન વચ્ચેનો તફાવત આયાત દ્વારા પૂરો થાય છે. ભૂ-રાજકીય કારણોસર પુરવઠા શૃંખલામાં વિક્ષેપ ટાળવા માટે, ખાતર કંપનીઓએ સતત પુરવઠો સુનિશ્ચિત કરવા માટે DAP ઉત્પાદક દેશો સાથે લાંબા ગાળાના કરાર કર્યા છે.

ખાતરની આયાતમાં યુરિયાનો પણ મહત્વપૂર્ણ હિસ્સો છે. નાણાકીય વર્ષ 2024-25માં યુરિયાની આયાત 56.47 લાખ ટન, 2023-24માં 70.42 લાખ ટન, 2022-23માં 75.80 લાખ ટન, 2021-22માં 91.36 લાખ ટન અને 2020-21માં 98.28 લાખ ટન રહી હતી.