PM E Drive scheme : ઇલેક્ટ્રિક ટ્રક ખરીદી પર 9.6 લાખની સબસિડી, સરકારે શરૂ કરી PM ઇ-ડ્રાઇવ યોજના

PM ઇ-ડ્રાઇવ યોજના માટે કુલ 10,900 કરોડ રૂપિયાના બજેટમાંથી 500 કરોડ રૂપિયા ઇલેક્ટ્રિક ટ્રકો માટે ફાળવવામાં આવ્યા છે. આ યોજના 5600 ઇલેક્ટ્રિક ટ્રકોને સમર્થન આપશે. બંદરગાહ, લોજિસ્ટિક્સ, સિમેન્ટ અને સ્ટીલ જેવા ઉદ્યોગો આ યોજનાના મુખ્ય લાભાર્થી હશે. સબસિડી ટ્રકના ગ્રોસ વ્હીકલ વેઇટ (GVW) પર આધારિત હશે અને તે ‘પહેલા આવો, પહેલા પામો’ના ધોરણે OEMs (ઓરિજિનલ ઇક્વિપમેન્ટ મેન્યુફેક્ચરર્સ)ને PM ઇ-ડ્રાઇવ પ્લેટફોર્મ દ્વારા આપવામાં આવશે.

ટ્રકોનું વાયુ પ્રદૂષણમાં યોગદાન

મંત્રી કુમારસ્વામીએ જણાવ્યું કે, ડીઝલ ટ્રકોની કુલ વાહન સંખ્યામાં માત્ર 3% હિસ્સેદારી હોવા છતાં, ટ્રાન્સપોર્ટેશન સંબંધિત ગ્રીનહાઉસ ગેસ ઉત્સર્જનમાં તેમનું યોગદાન 42% છે. આ યોજના પર્યાવરણને અનુકૂળ ટ્રાન્સપોર્ટેશનને પ્રોત્સાહન આપશે અને 2070 સુધીમાં શૂન્ય કાર્બન ઉત્સર્જનના લક્ષ્યને હાંસલ કરવામાં મદદ કરશે.

ઇ-ટ્રકની બેટરી અને વોરંટી

આ યોજના હેઠળ N2 (3.5 ટનથી 12 ટન GVW) અને N3 (12 ટનથી 55 ટન GVW) કેટેગરીના ઇલેક્ટ્રિક ટ્રકો પર સબસિડી લાગુ થશે. ઉત્પાદકો બેટરી માટે 5 વર્ષ અથવા 5 લાખ કિલોમીટર અને વાહન તેમજ મોટર માટે 5 વર્ષ અથવા 2.5 લાખ કિલોમીટરની વોરંટી આપશે.

પર્યાવરણ અને વિકસિત ભારતનું લક્ષ્ય

આ યોજના પ્રધાનમંત્રી નરેન્દ્ર મોદીના વિકસિત ભારત 2047ના વિઝન અને 2070 સુધી નેટ ઝીરો કાર્બન ઉત્સર્જનના લક્ષ્યને સમર્થન આપે છે. આ યોજના દ્વારા દેશમાં ઇલેક્ટ્રિક ટ્રકનો ઉપયોગ વધશે, જેનાથી વાયુ પ્રદૂષણ ઘટશે અને પર્યાવરણને ફાયદો થશે.