અમેરિકાના ટેરિફ ફેરફારની ભારત પર શું અસર થશે? નાણામંત્રી નિર્મલા સીતારમણે કહ્યું- ‘અત્યારે કંઈ પણ કહેવું ઉતાવળ ગણાશે'

Nirmala Sitharaman, US Tariff Hike: અમેરિકાના રાષ્ટ્રપતિ ડોનાલ્ડ ટ્રમ્પ દ્વારા ઈમ્પોર્ટ ડ્યુટી (આયાત શુલ્ક)માં કરવામાં આવેલા ધરખમ વધારાને લઈને સમગ્ર વિશ્વમાં ચર્ચા જાગી છે. આ ફેરફારોની ભારતીય અર્થતંત્ર પર શું અસર પડશે તેવા સવાલના જવાબમાં ભારતના નાણામંત્રી નિર્મલા સીતારમણે મહત્વનું નિવેદન આપ્યું છે. તેમણે સ્પષ્ટ કર્યું છે કે આ અંગે અત્યારે જ કોઈ પણ ટિપ્પણી કરવી તે ‘ઉતાવળ' ગણાશે.

વાણિજ્ય મંત્રાલય કરી રહ્યું છે સમીક્ષા

સોમવારે એક કાર્યક્રમ દરમિયાન નાણામંત્રીએ જણાવ્યું હતું કે, અમેરિકાના ટેરિફ ફેરફારોની ભારત પર કેવી અસર થશે, તે અંગે અત્યારે વાણિજ્ય મંત્રાલય (Commerce Ministry) ઝીણવટપૂર્વક તપાસ કરી રહ્યું છે. સીતારમણે કહ્યું, "માત્ર ભારતીય અર્થતંત્ર જ નહીં, પરંતુ ખાસ કરીને વેપારના મુદ્દે મંત્રાલય સ્થિતિની સમીક્ષા કરી રહ્યું છે. અમારું પ્રતિનિધિમંડળ આગળની વાટાઘાટો માટે ક્યારે જશે તે પણ નક્કી કરવાનું બાકી છે, તેથી હાલમાં કોઈ તારણ પર આવવું વહેલું ગણાશે."

શું છે સમગ્ર વિવાદ?

અમેરિકાની સુપ્રીમ કોર્ટે ટ્રમ્પ પ્રશાસન દ્વારા અન્ય દેશો પર લાદવામાં આવેલી વ્યાપક ઈમ્પોર્ટ ડ્યુટી વિરુદ્ધ ચુકાદો આપ્યો હતો. આ પછી ડોનાલ્ડ ટ્રમ્પે જાહેરાત કરી હતી કે 24 ફેબ્રુઆરીથી 150 દિવસ માટે ભારત સહિત તમામ દેશો પર 10 ટકા શુલ્ક લાગુ કરવામાં આવશે. જોકે, શનિવારે આ દરમાં વધારો કરીને તેને 15 ટકા કરી દેવામાં આવ્યો હતો. આ નિર્ણયથી ભારત સહિત અનેક દેશોના નિકાસકારોમાં ચિંતા જોવા મળી રહી છે.

વાટાઘાટોમાં વિલંબની શક્યતા

સૂત્રો પાસેથી મળતી માહિતી મુજબ, ભારત અને અમેરિકા વચ્ચે વચગાળાના વેપાર કરારના મુસદ્દાને અંતિમ રૂપ આપવા માટે વોશિંગ્ટનમાં એક મહત્વની બેઠક યોજાવાની હતી. પરંતુ વર્તમાન સ્થિતિને જોતા આ બેઠકને ફરીથી શેડ્યૂલ (પુનઃનિર્ધારિત) કરવાનો નિર્ણય લેવામાં આવ્યો છે. આ સમજૂતી માટે ભારતના મુખ્ય વાટાઘાટકાર તરીકે કોમર્સ મંત્રાલયના સંયુક્ત સચિવ દર્પણ જૈન જવાબદારી સંભાળી રહ્યા છે.