Gold-Silver Price Drop : બજેટના દિવસે સોના-ચાંદીમાં મોટો કડાકો! ભાવ 9% તૂટ્યા, રોકાણકારોમાં ફફડાટ - જાણો લેટેસ્ટ ભાવ

Gold-Silver Price Down : બજેટના દિવસે જ્યાં આખા દેશની નજર નાણામંત્રીની જાહેરાતો પર હતી, ત્યાં બીજી તરફ બુલિયન માર્કેટમાં જાણે ભૂકંપ આવી ગયો હોય તેવી સ્થિતિ સર્જાઈ છે. 1 ફેબ્રુઆરી એટલે કે રવિવારે બજેટ રજૂ થવાનું હોવાથી કોમોડિટી એક્સચેન્જ (MCX) ખુલ્લું હતું, પરંતુ ટ્રેડિંગ શરૂ થતાંની સાથે જ સોના અને ચાંદીના ભાવમાં જબરદસ્ત કડાકો બોલી ગયો છે. બજેટના દિવસે જ સોનું અને ચાંદી બંને 9-9 ટકા જેટલા તૂટી જતા રોકાણકારોમાં ડરનો માહોલ છે.

સોના-ચાંદીમાં લોઅર સર્કિટ લાગી

રવિવારે સવારે જ્યારે માર્કેટ ખુલ્યું ત્યારે સોના-ચાંદીમાં સામાન્ય નરમાઈ હતી, પરંતુ જોતજોતામાં વેચવાલીનું દબાણ એટલું વધી ગયું કે બંને ધાતુઓમાં લોઅર સર્કિટ લાગી ગઈ. સવારે 9:32 વાગ્યાના અરસામાં ગોલ્ડ ફ્યુચર્સ (ફેબ્રુઆરી ડિલિવરી) સીધું 9 ટકા તૂટીને 1,36,185 રૂપિયા પ્રતિ 10 ગ્રામના લેવલ પર પહોંચી ગયું હતું. તેવી જ રીતે ચાંદીના વાયદા (માર્ચ ડિલિવરી) ના ભાવ પણ 9 ટકાના ઘટાડા સાથે 2,65,652 રૂપિયા પ્રતિ કિલોગ્રામ પર ટ્રેડ થઈ રહ્યા હતા.

1980 પછી ચાંદીમાં સૌથી મોટો ઘટાડો

માર્કેટ એક્સપર્ટ્સના મતે, સોના-ચાંદીમાં ઘટાડાનો દોર 30 જાન્યુઆરીથી જ શરૂ થઈ ગયો હતો, જે બજેટના દિવસે એટલે કે 1 ફેબ્રુઆરીએ પણ ચાલુ રહ્યો. નિષ્ણાતોનું કહેવું છે કે ચાંદીમાં એક જ દિવસમાં આટલો મોટો કડાકો છેલ્લે 1980 ના વર્ષમાં જોવા મળ્યો હતો. ઐતિહાસિક રીતે આ ઘટાડો ખૂબ મોટો માનવામાં આવે છે.

ભાવ તૂટવા પાછળના મુખ્ય કારણો

ચોઈસ વેલ્થના સીઈઓ નિકુંજ સરાફે આ ઘટાડા પાછળના કારણો જણાવતા કહ્યું કે, આમાં કોઈ મોટું રહસ્ય નથી. 29 જાન્યુઆરીએ MCX પર ભાવ રેકોર્ડ હાઈ લેવલે પહોંચ્યા હતા, તેથી 'પ્રોફિટ બુકિંગ' (નફો વસૂલવો) તો આવવાની જ હતી.