અદાણી ગ્રૂપે જીતી મોટી બિડ, મહારાષ્ટ્રને 6,600 મેગાવોટ વીજળી કરશે સપ્લાય, જાણો વિગતો

અદાણી ગ્રુપે મહારાષ્ટ્રને લાંબા ગાળા માટે 6,600 મેગાવોટ રિન્યુએબલ એનર્જી અને થર્મલ પાવર સપ્લાય કરવાની બિડ જીતી લીધી છે. કંપનીએ આ માટે યુનિટ દીઠ રુપિયા 4.08ની બોલી લગાવી અને JSW એનર્જી અને ટોરેન્ટ પાવરને પાછળ છોડી દીધા. સૂત્રોએ આ માહિતી આપી છે. 25 વર્ષ માટે રિન્યુએબલ અને થર્મલ પાવર બંનેના સપ્લાય માટે અદાણી ગ્રૂપની બિડ મહારાષ્ટ્ર હાલમાં જે દરે વીજળી ખરીદે છે તેના કરતાં યુનિટ દીઠ એક રૂપિયો ઓછો છે, એમ આ બાબતથી પરિચિત બે સૂત્રોએ જણાવ્યું હતું. આનાથી રાજ્યને તેની ભાવિ વીજ જરૂરિયાતો પૂરી કરવામાં મદદ મળશે.

સપ્લાય ક્યારે થશે?

લેટર ઓફ ઈન્ટેન્ટ (LOI) જારી થયાની તારીખથી 48 મહિનાની અંદર વીજળીનો પુરવઠો શરૂ થવાનો છે. બિડની શરતો મુજબ, અદાણી પાવર સમગ્ર પુરવઠા સમયગાળા દરમિયાન પ્રતિ યુનિટ રુપિયા 2.70ના દરે સૌર ઊર્જા સપ્લાય કરશે. તે જ સમયે, કોલસામાંથી ઉત્પાદિત વીજળીની કિંમત કોલસાની કિંમતોના આધારે નક્કી કરવામાં આવશે. મહારાષ્ટ્ર સ્ટેટ ઇલેક્ટ્રિસિટી ડિસ્ટ્રિબ્યુશન કંપની (MSEDCL) એ માર્ચમાં સૂર્યપ્રકાશમાંથી ઉત્પન્ન થતી 5,000 મેગાવોટ અને કોલસામાંથી ઉત્પાદિત 1,600 મેગાવોટ વીજળી મેળવવા માટે ચોક્કસ ટેન્ડર બહાર પાડ્યું હતું. તે લોકસભાની ચૂંટણી માટે આદર્શ આચાર સંહિતા લાગુ થયા પહેલા જારી કરવામાં આવી હતી અને રાજ્યમાં વિધાનસભા ચૂંટણીની જાહેરાત પહેલા અદાણીને આપવામાં આવી છે.

કયા દરે બિડ કરવામાં આવી હતી?

આ ટેન્ડરમાં પીક પાવરની માંગને પહોંચી વળવા સૌર ઉર્જા અને થર્મલ પાવર બંનેનો પુરવઠો સામેલ છે. સૂત્રોના જણાવ્યા અનુસાર, અદાણી પાવરે કોન્ટ્રાક્ટ જીતવા માટે યુનિટ દીઠ રુપિયા 4.08ની બોલી લગાવી હતી. જ્યારે, બીજી સૌથી નીચી બિડ JSW એનર્જીની રુપિયા 4.36 પ્રતિ યુનિટ હતી. આ ગયા વર્ષે મહારાષ્ટ્રમાં 4.70 રૂપિયા પ્રતિ યુનિટના ભાવે ખરીદાયેલી વીજળીની સરેરાશ કિંમત કરતાં ઓછી છે. મહારાષ્ટ્ર ઇલેક્ટ્રિસિટી રેગ્યુલેટરી કમિશન (MERC) એ 2024-25 માટે સરેરાશ વીજ ખરીદ કિંમત રુપિયા 4.97 પ્રતિ યુનિટ નક્કી કરી છે. આમ, અદાણી દ્વારા કરવામાં આવેલી બિડ આના કરતાં યુનિટ દીઠ લગભગ એક રૂપિયા ઓછી છે. 25 વર્ષ માટે વીજળી સપ્લાય કરવાના ટેન્ડરમાં કુલ ચાર કંપનીઓએ ભાગ લીધો હતો. દેશની સૌથી મોટી પ્રાઇવેટ ક્ષેત્રની થર્મલ પાવર પ્રોડક્શન અદાણી પાવરની ઉત્પાદન ક્ષમતા 17 GW કરતાં વધુ છે, જે 2030 સુધીમાં વધીને 31 GW થશે. તેની પેટાકંપની, અદાણી ગ્રીન એનર્જી લિમિટેડ દેશની સૌથી મોટી રિન્યુએબલ એનર્જી કંપની છે જેની ઉત્પાદન ક્ષમતા 11 GW છે. 2030 સુધીમાં તેને 50 ગીગાવોટ સુધી વધારવાનું લક્ષ્ય છે.

આ પણ વાંચો - US President Election: ડોનાલ્ડ ટ્રમ્પની ફરી હત્યાનો પ્રયાસ, વધુ એક ફાયરિંગ, અમેરિકામાં અફરા તફરી