Whirlpool India Q1 Results: જાણીતી કન્ઝ્યુમર ડ્યુરેબલ અને હોમ એપ્લાયન્સીસ કંપની વર્લપુલ ઇન્ડિયાએ પોતાના જૂન ક્વાર્ટરના નાણાકીય પરિણામો જાહેર કર્યા છે. આ પરિણામો રોકાણકારો માટે થોડા નિરાશાજનક રહ્યા છે. કંપનીની આવકમાં ભલે વધારો થયો હોય, પરંતુ નફા અને માર્જિનમાં મોટો ઘટાડો નોંધાયો છે. આ નબળા પરિણામોની સીધી અસર આજે શેરબજારમાં કંપનીના શેર પર જોવા મળી હતી.
Whirlpool India Q1 Results: નફામાં 29%નો મોટો ઘટાડો, ખર્ચ વધતા શેરમાં કડાકો, જાણો કંપનીના લેટેસ્ટ આંકડા
હોમ એપ્લાયન્સીસ બનાવતી કંપની વર્લપુલ ઇન્ડિયાના લેટેસ્ટ ક્વાર્ટર પરિણામો નિરાશાજનક રહ્યા છે. કંપનીનો નફો 29% ઘટીને 103 કરોડ રૂપિયા પર આવી ગયો છે, જેનાથી શેરમાં દબાણ છે.
MoneyControl Newsઅપડેટેડ Aug 05, 2026 પર 4:26 PM
નફો ઘટ્યો પણ આવક વધી
કંપની દ્વારા જાહેર કરાયેલા આંકડાઓ મુજબ, આ ક્વાર્ટરમાં વર્લપુલ ઇન્ડિયાનો કોન્સોલિડેટેડ નફો 29.4% ઘટીને 103 કરોડ રૂપિયા થઈ ગયો છે. ગયા વર્ષે આ જ સમયગાળામાં કંપનીએ 146 કરોડ રૂપિયાનો નફો કર્યો હતો.
જોકે, રાહતની વાત એ છે કે કંપનીની આવકમાં 12% નો વધારો જોવા મળ્યો છે. ગયા વર્ષે 2,432 કરોડ રૂપિયાની આવક સામે આ વખતે કંપનીએ 2,727 કરોડ રૂપિયાની આવક નોંધાવી છે. ટેક્સ પહેલાના નફાની (PBT) વાત કરીએ તો, તે 196.4 કરોડ રૂપિયાથી ઘટીને 138.8 કરોડ રૂપિયા પર આવી ગયો છે.
નફો કેમ ઘટ્યો?
કંપનીનો નફો ઘટવા પાછળનું મુખ્ય કારણ મોંઘવારી અને ખર્ચમાં થયેલો વધારો છે. કંપનીનો કુલ ખર્ચ 2,289.9 કરોડ રૂપિયાથી વધીને 2,656.9 કરોડ રૂપિયા થઈ ગયો છે. કંપનીને પ્રોડક્ટ્સ બનાવવા માટે વપરાતા કાચા માલ અને પાર્ટ્સનો ખર્ચ 1,187.3 કરોડ રૂપિયાથી વધીને સીધો 1,427 કરોડ રૂપિયા થઈ ગયો છે. સ્ટાફ અને કર્મચારીઓના ફાયદા માટે થતો ખર્ચ પણ 221.1 કરોડ રૂપિયાથી વધીને 242.9 કરોડ રૂપિયા પર પહોંચી ગયો છે. અન્ય ઓપરેટિંગ ખર્ચાઓ પણ 380.7 કરોડથી ઉછળીને 439.3 કરોડ રૂપિયા થઈ ગયા છે.
ઓપરેટિંગ માર્જિનમાં મોટો ફટકો
વધતા ખર્ચને કારણે કંપનીના કામકાજના નફામાં મોટો ઘટાડો આવ્યો છે. તે ગયા વર્ષના 211 કરોડ રૂપિયાથી 34% તૂટીને 140 કરોડ રૂપિયા પર આવી ગયો છે. આ સાથે જ કંપનીનું EBITDA માર્જિન પણ 8.7% થી ઘટીને માત્ર 5% રહી ગયું છે.
મેનેજમેન્ટ લેવલ પર મોટા ફેરફારો
વર્લપુલ ઇન્ડિયા હોમ એપ્લાયન્સીસ સેગમેન્ટમાં જ કામ કરે છે. કંપનીના બોર્ડે મેનેજમેન્ટમાં કેટલાક મોટા ફેરફારોને મંજૂરી આપી છે, અત્યારે જેઓ હેડ ઓફ સર્વિસ છે, તેવા અનીશ આહૂજા 1 સપ્ટેમ્બરથી સબસિડિયરી કંપનીમાં ચીફ ઓપરેટિંગ ઓફિસરનું પદ સંભાળશે. મેન્યુફેક્ચરિંગ ફાઇનાન્સના હેડ અંકિત ગુપ્તાએ રાજીનામું આપ્યું છે, જે 14 ઓગસ્ટથી લાગુ થશે. તેમની જગ્યાએ 10 ઓગસ્ટથી સૌરવ ચક્રવર્તી નવા હેડ ઓફ ફાઇનાન્સ તરીકે કાર્યભાર સંભાળશે.
શેરબજારમાં વર્લપુલના શેરની સ્થિતિ
આ પરિણામોની જાહેરાત થતા જ કંપનીના શેરમાં 4.8% નો મોટો કડાકો બોલાયો હતો અને તે 781.15 રૂપિયાના ઇન્ટ્રાડે લો પર પહોંચી ગયો હતો. જોકે, દિવસના અંતે થોડી રિકવરી આવતા શેર 1.49% ના ઘટાડા સાથે 808.3 રૂપિયા પર બંધ થયો હતો. તમને જણાવી દઈએ કે ગ્લોબલ લેવલ પર પણ માંગ ઘટવાને કારણે પેરેન્ટ કંપની વર્લપુલ કોર્પોરેશને કમાણીનો અંદાજ ઘટાડ્યો છે. આ વર્ષે અત્યાર સુધીમાં આ શેરમાં 10% નો ઘટાડો આવી ચૂક્યો છે.
ડિસ્ક્લેમર: આ માહિતી માત્ર જાણકારીના હેતુથી આપવામાં આવી છે. અહીં જણાવવું જરૂરી છે કે શેરબજારમાં રોકાણ એ બજારના જોખમોને આધીન છે. રોકાણકારોએ કોઈપણ જગ્યાએ નાણાં રોકતા પહેલા હંમેશા નિષ્ણાતની સલાહ લેવી જોઈએ. મનીકંટ્રોલ દ્વારા ક્યારેય પણ કોઈને રોકાણ કરવાની સલાહ આપવામાં આવતી નથી.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.