રોકાણકારો માટે ખુશખબર: SBI Funds Management ના IPO ને SEBI ની લીલીઝંડી, જુલાઈમાં આવી શકે છે પ્રાઇસ બેન્ડ

SBI Funds Management IPO: ભારતીય શેરબજારમાં રોકાણ કરીને કમાણી કરવા માંગતા લોકો માટે એક મોટા સમાચાર સામે આવ્યા છે. દેશની સૌથી મોટી એસેટ મેનેજમેન્ટ કંપની SBI ફંડ્સ મેનેજમેન્ટના બહુચર્ચિત IPO નો રસ્તો હવે સંપૂર્ણપણે સાફ થઈ ગયો છે. માર્કેટ રેગ્યુલેટર SEBI એ કંપનીના ડ્રાફ્ટ રેડ હેરિંગ પ્રોસ્પેક્ટસને પોતાની ઔપચારિક મંજૂરી આપી દીધી છે.

SEBI ની વેબસાઈટ પર આપેલી માહિતી મુજબ, આ મંજૂરી 12 જૂન 2026 ના રોજ આપવામાં આવી છે. ઇન્ડસ્ટ્રીના સૂત્રોના જણાવ્યા અનુસાર, હવે કંપની જુલાઈના પહેલા સપ્તાહમાં પોતાનું રેડ હેરિંગ પ્રોસ્પેક્ટસ ફાઈલ કરી શકે છે અને સાથે જ પ્રાઈસ બેન્ડની પણ જાહેરાત થઈ શકે છે. નોંધનીય છે કે, કંપનીએ 19 માર્ચ 2026 ના રોજ પોતાનો ડ્રાફ્ટ સેબીમાં જમા કરાવ્યો હતો.

સંપૂર્ણપણે ઓફર-ફોર-સેલ રહેશે આ IPO

આ IPO માં કંપની કોઈ નવા શેર બહાર પાડવાની નથી. આ પૂરેપૂરો ઓફર-ફોર-સેલ રહેશે, એટલે કે IPO માંથી થનારી કમાણી સીધી શેર વેચનારાઓ પાસે જશે. આ ઈશ્યુ અંતર્ગત પ્રમોટર અને હાલના રોકાણકારો દ્વારા 20.37 કરોડ ઈક્વિટી શેર વેચાણ માટે મૂકવામાં આવશે.

જેમાં પ્રમોટર સ્ટેટ બેન્ક ઓફ ઈન્ડિયા પોતાના 12.83 કરોડ શેર (6.3 ટકા હિસ્સો) અને પેરિસ સ્થિત કંપની અમુંડી ઈન્ડિયા હોલ્ડિંગ 7.53 કરોડ શેર (3.7 ટકા હિસ્સો) વેચશે. હાલમાં SBI પાસે કંપનીમાં 61.76 ટકા અને અમુંડી ઈન્ડિયા હોલ્ડિંગ પાસે 36.26 ટકા માલિકી હિસ્સો છે.

શેરબજારમાં લિસ્ટ થનારી SBI ની ત્રીજી સબસિડિયરી

SBI ફંડ્સ મેનેજમેન્ટની શરૂઆત વર્ષ 1992 માં થઈ હતી. માર્ચ 2021 થી તે 15.4 ટકા મ્યુચ્યુઅલ ફંડ માર્કેટ શેર સાથે દેશની નંબર વન એસેટ મેનેજમેન્ટ કંપની બની ગઈ છે. વર્ષ 2004 માં તેમાં સોસાયટે જનરલ એસેટ મેનેજમેન્ટે 37 ટકા હિસ્સો ખરીદ્યો હતો. બાદમાં 2011 માં અમુંડી એસેટ મેનેજમેન્ટે આ હિસ્સો પોતાના નામે કરી લીધો હતો. જો આ લિસ્ટિંગ સફળ રહેશે, તો આ SBI ની ત્રીજી એવી પેટા કંપની હશે જે સ્ટોક એક્સચેન્જ પર લિસ્ટ થશે.