શેર બજારમાં PNGS Reva Diamond Jewellery ની નબળી એન્ટ્રી, 4% ડિસ્કાઉન્ટ સાથે થયું લિસ્ટિંગ

PNGS Reva IPO Listing: બુધવારે, 4 માર્ચના રોજ શેર બજારમાં PNGS Reva Diamond Jewellery નું લિસ્ટિંગ રોકાણકારોની અપેક્ષા મુજબ રહ્યું નથી. દલાલ સ્ટ્રીટ પર આ કંપનીના શેરે ધીમી શરૂઆત કરી છે અને પોતાના ઇશ્યૂ પ્રાઇસથી લગભગ 4% નીચે માર્કેટમાં એન્ટ્રી કરી છે.

કંપનીનો શેર BSE પર 372ના ભાવે ખુલ્યો હતો. આ આંકડો 386 ના ઇશ્યૂ પ્રાઇસ કરતાં 3.6% ઓછો છે. કંપનીએ પોતાના આ IPO માટે 386 નો અપર પ્રાઇસ બેન્ડ નક્કી કર્યો હતો. જોકે, બજારની સુસ્તી અને ઓછી ડિમાન્ડના કારણે રોકાણકારોને કોઈ લિસ્ટિંગ ગેઇનનો લાભ મળી શક્યો નથી.

કેવો રહ્યો હતો રોકાણકારોનો રિસ્પોન્સ?

380 કરોડના આ IPO ને રોકાણકારો તરફથી કોઈ ખાસ અને ઉત્સાહજનક પ્રતિસાદ મળ્યો ન હતો. સબસ્ક્રિપ્શનના ત્રીજા દિવસ સુધીમાં આ ઇશ્યૂ કુલ 1.23 ગણો ભરાયો હતો. તેમાં રિટેલ રોકાણકારોનો હિસ્સો 1.29 ગણો અને નોન-ઇન્સ્ટિટ્યુશનલ ઇન્વેસ્ટર્સ (NII) નો હિસ્સો 1.54 ગણો સબસ્ક્રાઇબ થયો હતો. જ્યારે બીજી બાજુ, QIB (ક્વોલિફાઇડ ઇન્સ્ટિટ્યુશનલ બાયર્સ) નો હિસ્સો માત્ર 1.04 ગણો જ ભરાયો હતો.

કંપનીની આર્થિક સ્થિતિ અને બેકગ્રાઉન્ડ

PNGS Reva Diamond Jewellery એ પુણેની એક ખૂબ જ જાણીતી ડાયમંડ જ્વેલરી બ્રાન્ડ છે. આ કંપની ‘P N Gadgil & Sons Ltd' માંથી અલગ થઈને એક સ્વતંત્ર રિટેલ કંપની તરીકે બનાવવામાં આવી છે.

31 માર્ચ, 2025 સુધીના આંકડા મુજબ, કંપની મહારાષ્ટ્ર, ગુજરાત અને કર્ણાટકના 25 શહેરોમાં કુલ 33 સ્ટોર્સ ચલાવી રહી હતી. નાણાકીય વર્ષ 2025 ના રિપોર્ટ પ્રમાણે, કંપનીની આવકમાં 32% નો વધારો જોવા મળ્યો હતો અને તે 258.18 કરોડ નોંધાઈ હતી. સાથે જ નફો 40% વધીને 59.47 કરોડ પર પહોંચી ગયો હતો.