‘અભી ન જાઓ છોડકર...' સૂરની દેવી આશા ભોંસલેએ 92 વર્ષની વયે દુનિયાને કહ્યું અલવિદા, સંગીત જગતમાં ઘેરો શોક

Asha Bhosle Death News: ભારતીય સંગીત જગત માટે એક અત્યંત દુખદ સમાચાર સામે આવ્યા છે. ‘સૂરની રાણી' અને કરોડો લોકોના દિલ પર રાજ કરનાર દિગ્ગજ ગાયિકા આશા ભોંસલેનું 92 વર્ષની વયે નિધન થયું છે. શનિવારે તેમને હાર્ટ એટેક આવ્યા બાદ મુંબઈની બ્રીચ કેન્ડી હોસ્પિટલના ICUમાં દાખલ કરવામાં આવ્યા હતા, જ્યાં સારવાર દરમિયાન તેમણે અંતિમ શ્વાસ લીધા હતા. આવતીકાલે સાંજે 4 વાગ્યે તેમના અંતિમ સંસ્કાર કરવામાં આવશે.

પૌત્રીએ આપી હતી તબિયતની જાણકારી

આશા ભોંસલેની તબિયત બગડતા તેમની પૌત્રી જનાઈ ભોંસલેએ સોશિયલ મીડિયા પ્લેટફોર્મ X પર એક પોસ્ટ શેર કરી હતી. તેમણે જણાવ્યું હતું કે, "મારી દાદી આશા ભોંસલેને નબળાઈ અને છાતીમાં ઈન્ફેક્શનને કારણે હોસ્પિટલમાં દાખલ કરવા પડ્યા છે. અમે આપ સૌને પ્રાઈવસી જાળવવા વિનંતી કરીએ છીએ." જોકે, દુર્ભાગ્યવશ ડૉક્ટરોના તમામ પ્રયત્નો છતાં આશા તાઈને બચાવી શકાયા નથી.

7 દાયકા લાંબી શાનદાર સફર

આશા ભોંસલે ભારતીય સંગીત ઇતિહાસના સૌથી તેજસ્વી સિતારા પૈકીના એક હતા. 7 દાયકાથી વધુ લાંબી કારકિર્દીમાં તેમણે હિન્દી, બંગાળી, મરાઠી સહિત 20 થી વધુ ભારતીય અને વિદેશી ભાષાઓમાં 12,000 થી વધુ ગીતોને પોતાનો અવાજ આપ્યો છે. આર.ડી. બર્મન, એસ.ડી. બર્મન, ઓ.પી. નૈયર અને એ.આર. રહેમાન જેવા દિગ્ગજ સંગીતકારો સાથે મળીને તેમણે અનેક સદાબહાર ગીતો આપ્યા છે.

સંગીત સિવાય અભિનય અને બિઝનેસમાં પણ હતા સક્રિય

પ્રથમ ગીત: તેમણે 1943માં મરાઠી ફિલ્મ ‘માઝા બલ' માટે પ્રથમ ગીત રેકોર્ડ કર્યું હતું.