એશિયા પાવર ઈન્ડેક્સ 2025: ભારત વિશ્વના ટોચના 3 શક્તિશાળી દેશોમાં, 'મેજર પાવર' તરીકે ઉભર્યું

Asia Power Index 2025: ઓસ્ટ્રેલિયાની પ્રતિષ્ઠિત થિંક-ટેન્ક, લોવી (Lowy) ઇન્સ્ટિટ્યૂટએ પોતાનો વાર્ષિક 'એશિયા પાવર ઇન્ડેક્સ 2025' રિપોર્ટ જાહેર કર્યો છે, જે એશિયા ક્ષેત્રમાં રાજકીય, આર્થિક અને સૈન્ય શક્તિના સમીકરણોમાં થઈ રહેલા મોટા ફેરફારોને ઉજાગર કરે છે. આ રિપોર્ટ એશિયાના 27 દેશોમાં 8 મુખ્ય ક્ષેત્રો – સૈન્ય ક્ષમતા, સંરક્ષણ નેટવર્ક, આર્થિક તાકાત, રાજદ્વારી પ્રભાવ, સાંસ્કૃતિક પહોંચ, લચીલાપણું, ભવિષ્યના સંસાધન ક્ષમતા અને આર્થિક સંબંધો પર આધારિત વિસ્તૃત મૂલ્યાંકન પૂરું પાડે છે. આ ઇન્ડેક્સ મુજબ, યુનાઇટેડ સ્ટેટ્સ ઑફ અમેરિકાનો પ્રભાવ ઘટ્યો છે, જ્યારે ચીન મુખ્ય શક્તિ તરીકે મજબૂત રીતે ઉભરી રહ્યું છે અને ભારત સતત પ્રગતિ કરી રહ્યું છે.

ભારતનો વધતો પ્રભાવ: 'મેજર પાવર' તરીકે ઉદય

લોવી ઇન્સ્ટિટ્યૂટનો રિપોર્ટ એશિયામાં ભારતનો વધતો પ્રભાવ સ્પષ્ટપણે દર્શાવે છે. વર્ષ 2025માં, ભારતે 40.0નો સ્કોર મેળવીને 'મેજર પાવર' બનવાની સીમા પાર કરી લીધી છે. ભારતનો આ નોંધપાત્ર ઉદય તેની મજબૂત આર્થિક વૃદ્ધિ અને વધતી સૈન્ય તાકાતને આભારી છે. જોકે, રિપોર્ટમાં ધ્યાન દોરવામાં આવ્યું છે કે ભારતનો રાજદ્વારી અને આર્થિક પ્રભાવ હજી તેની વધેલી સૈન્ય અને સંસાધન શક્તિ સાથે સંપૂર્ણપણે સુસંગત નથી. આ દર્શાવે છે કે ભારત પાસે ભવિષ્યમાં પોતાની વૈશ્વિક શક્તિ વધારવાની હજુ ઘણી મોટી સંભાવનાઓ છે.

દુનિયાના ટોચના 10 શક્તિશાળી દેશોની સ્થિતિ

એશિયા પાવર ઇન્ડેક્સ 2025 મુજબ, વૈશ્વિક શક્તિના સ્તરે ફક્ત અમેરિકા અને ચીનને જ 'સુપર પાવર' શ્રેણીમાં સ્થાન મળ્યું છે. અમેરિકા હજુ પણ ટોચ પર 80.5ના સ્કોર સાથે બિરાજમાન છે, પરંતુ 2018માં ઇન્ડેક્સ શરૂ થયા પછી આ તેનો સૌથી ઓછો સ્કોર છે, જે ટ્રમ્પ પ્રશાસન દરમિયાન લેવાયેલા નીતિગત નિર્ણયોને કારણે એશિયામાં અમેરિકી પ્રભાવમાં ઘટાડો સૂચવે છે. બીજી તરફ, ચીન 73.7 ના સ્કોર સાથે બીજા ક્રમે રહીને અમેરિકા સાથેનો તફાવત સતત ઘટાડી રહ્યું છે.

આ યાદીમાં ભારત 40.0 સ્કોર સાથે ત્રીજા સ્થાને રહીને 'મેજર પાવર' તરીકે ઉભર્યું છે. ત્યારબાદ, જાપાન 38.8 સ્કોર સાથે ચોથા ક્રમે, રશિયા 32.1 સ્કોર સાથે પાંચમા સ્થાને, ઓસ્ટ્રેલિયા 31.8 સ્કોર સાથે છઠ્ઠા ક્રમે, દક્ષિણ કોરિયા 31.5 સ્કોર સાથે સાતમા સ્થાને, સિંગાપોર 26.8 સ્કોર સાથે આઠમા સ્થાને, ઇન્ડોનેશિયા 22.5 સ્કોર સાથે નવમા સ્થાને અને મલેશિયા 20.6 સ્કોર સાથે દસમા સ્થાને છે. આ તમામ દેશો 'મિડલ પાવર' શ્રેણીમાં સ્થાન ધરાવે છે. નોંધનીય છે કે પાકિસ્તાન આ ટોચના 10 દેશોમાંથી બહાર છે અને તેને 16મું સ્થાન મળ્યું છે.

રશિયાની સ્થિતિ મજબૂત: 'મિડલ પાવર'નો વધતો પ્રભાવ