ચીને માંગી ભારત પાસે ગેરંટી... આ વસ્તુ અમેરિકાને ના આપો, તો જ કરીશું સપ્લાય, જાણો સંપૂર્ણ અહેવાલ

Rare Earth Minerals form China: ચીન ભારત પાસે એક મોટી ગેરંટી માંગી રહ્યું છે. ચીનનું કહેવું છે કે ભારે રેર અર્થ મિનરલ્સની સપ્લાય શરૂ કરવા માટે ભારતે એ વાતની ખાતરી આપવી પડશે કે આ મિનરલ્સ અમેરિકાને ફરીથી એક્સપોર્ટ નહીં કરવામાં આવે. આ શરતને કારણે ભારત અને ચીન વચ્ચેની રેર અર્થ મિનરલ્સની સપ્લાયને લઈને ચર્ચા અટકી ગઈ છે, જેની સીધી અસર ભારતના ઇલેક્ટ્રિક વાહન અને ડિફેન્સ સેક્ટર પર પડી રહી છે.

ચીનની શરતો અને ભારતની તૈયારી

ચીન ઇચ્છે છે કે ભારત આ રેર અર્થ મિનરલ્સનો ઉપયોગ માત્ર ઘરેલું જરૂરિયાતો માટે જ કરે. રેર અર્થ મિનરલ્સ ઇલેક્ટ્રિક વાહનો, ડિફેન્સ સાધનો અને હાઇ-ટેક ઉદ્યોગો માટે અત્યંત મહત્વના છે. ભારતીય કંપનીઓએ ચીનના નિયમો પ્રમાણે લાસ્ટ યૂઝ સર્ટિફિકેટ જમા કરાવ્યા છે, જેમાં જણાવાયું છે કે આ મિનરલ્સનો ઉપયોગ સામૂહિક વિનાશના હથિયારો બનાવવા માટે નહીં થાય. જોકે, ચીન હજુ વધુ ખાતરીની માંગ કરી રહ્યું છે, જેના કારણે સપ્લાયમાં વિલંબ થઈ રહ્યો છે.

ચીનનું રેર અર્થ પર નિયંત્રણ

એક રિપોર્ટ અનુસાર, ચીન વૈશ્વિક રેર અર્થ મિનરલ્સના ઉત્પાદનનો 90% હિસ્સો નિયંત્રિત કરે છે. ચીને દેશ આધારિત ડેટા શેર કરવાનું પણ બંધ કરી દીધું છે, જેનાથી સપ્લાય ચેઇનની પારદર્શિતા ઘટી છે. એપ્રિલ 2025માં ચીને ‘રાષ્ટ્રીય સુરક્ષા’નું કારણ આપીને ભારે અને મધ્યમ રેર અર્થ સંબંધિત વસ્તુઓ પર એક્સપોર્ટ નિયંત્રણની જાહેરાત કરી હતી. આ નિયમો અનુસાર, માત્ર ચીનના વાણિજ્ય મંત્રાલયનું લાઇસન્સ ધરાવતા ખરીદદારો જ આ મિનરલ્સ ખરીદી શકે છે. યુરોપ અને દક્ષિણ-પૂર્વ એશિયાને સપ્લાય ચાલુ હોવા છતાં, ભારતીય વિક્રેતાઓને હજુ સુધી નિર્યાત લાઇસન્સ મળ્યું નથી.

હળવા રેર અર્થની સપ્લાય શરૂ

ઓગસ્ટ 2025માં શંઘાઈ સહયોગ સંગઠનના શિખર સંમેલન બાદ ચીને ભારતને હળવા રેર અર્થ ચુંબકની સપ્લાય ફરી શરૂ કરી હતી. જોકે, ભારે રેર અર્થ મિનરલ્સની સપ્લાય હજુ પણ અટકેલી છે. ગયા વર્ષે ભારતે 306 કરોડ રૂપિયાના 870 ટન રેર અર્થ ચુંબકની આયાત કરી હતી. આ ઘટાડાને કારણે ઇલેક્ટ્રિક વાહનો અને હાઇ-ટેક ઉદ્યોગોને મોટી અસર થઈ રહી છે.