Strait of Hormuz Alert: સ્ટ્રેટ ઓફ હોર્મુઝની આસપાસના દરિયાઈ વિસ્તારમાં ભારતીય જહાજોની સુરક્ષાને લઈને કેન્દ્ર સરકાર એકદમ સતર્ક બની ગઈ છે. આ સંવેદનશીલ વિસ્તારમાં રહેલા ભારતીય ધ્વજ તિરંગા વાળા અથવા ભારત સાથે જોડાયેલા 9 જહાજો પર ખાસ નજર રાખવામાં આવી રહી છે. કેન્દ્રીય બંદર, જહાજરાની અને જળમાર્ગ મંત્રી સર્બાનંદ સોનોવાલે ગુરુવારે મંત્રાલયના ઉચ્ચ અધિકારીઓ સાથે એક તાકીદની સમીક્ષા બેઠક યોજી હતી અને દરિયાઈ સુરક્ષા વ્યવસ્થા વધુ મજબૂત કરવાના આદેશ આપ્યા હતા. આ બેઠકમાં ભારતીય જહાજો અને તેમાં સવાર ખલાસીઓની સુરક્ષા સુનિશ્ચિત કરવા માટે લેવાનારા પગલાં પર વિસ્તૃત ચર્ચા કરવામાં આવી હતી.

