Delhi Pollution Parliament Session: દિલ્હીના પ્રદૂષણથી સાંસદ ત્રસ્ત! સંસદ સત્ર ગાંધીનગર કે હૈદરાબાદમાં યોજવાની માંગ

Delhi Pollution Parliament Session: દેશની રાજધાની દિલ્હીમાં શિયાળાની શરૂઆત થતાં જ હવાની ગુણવત્તા ખરાબ થઈ જાય છે. આ સમસ્યાથી હવે માત્ર સામાન્ય લોકો જ નહીં, પરંતુ દેશના નેતાઓ પણ પરેશાન થયા છે. દિલ્હીના ઝેરી વાતાવરણથી કંટાળીને એક સાંસદે એવી માંગ કરી છે, જેના કારણે રાજકીય વર્તુળોમાં ચર્ચા શરૂ થઈ ગઈ છે.

શું છે સમગ્ર મામલો?

ઓડિશાના બીજૂ જનતા દળ (BJD)ના રાજ્યસભા સાંસદ માનસ રંજન મંગરાજે સંસદમાં શૂન્યકાળ દરમિયાન દિલ્હીના પ્રદૂષણનો મુદ્દો ઉઠાવ્યો હતો. તેમણે કહ્યું કે દિલ્હીમાં દર વર્ષે વધતું પ્રદૂષણ એ કોઈ કુદરતી નહીં, પરંતુ ‘માનવસર્જિત આપત્તિ’ છે. આ ગંભીર પરિસ્થિતિને ધ્યાનમાં રાખીને તેમણે સંસદનું શિયાળુ સત્ર અને બજેટ સત્ર દિલ્હીની બહાર અન્ય કોઈ યોગ્ય સ્થળે યોજવાની જોરદાર માંગ કરી છે.

ઓડિશાનું ઉદાહરણ આપીને દિલ્હીને શીખ આપી

સાંસદ મંગરાજે પોતાના ગૃહ રાજ્ય ઓડિશાનું ઉદાહરણ આપતા કહ્યું કે, "ઓડિશા હંમેશાં વાવાઝોડા, પૂર જેવી કુદરતી આફતોનો સામનો કરતું આવ્યું છે અને અમે જાણીએ છીએ કે સંકટ કેવું હોય છે. ઓડિશા જે રીતે કુદરતી આફતો સામે લડવા માટે કુશળતાપૂર્વક કામ કરે છે, તેવી જ રીતે દિલ્હીએ પણ વાયુ પ્રદૂષણને નિયંત્રિત કરવા માટે પગલાં લેવાની જરૂર છે."

માત્ર સાંસદો જ નહીં, કર્મચારીઓની પણ ચિંતા

તેમણે ચિંતા વ્યક્ત કરતાં કહ્યું કે, આ ઝેરી હવામાં માત્ર સંસદના સભ્યો જ નહીં, પરંતુ સંસદીય અધિકારીઓ, ડ્રાઇવરો, સફાઈ કર્મચારીઓ અને સુરક્ષાકર્મીઓ પણ શ્વાસ લે છે, જેમના કારણે સંસદની કાર્યવાહી સરળતાથી ચાલે છે. તેમણે કહ્યું, "આપણે આ લોકોની સમસ્યાને નજરઅંદાજ ન કરી શકીએ. જે મહિનાઓમાં દિલ્હીમાં પ્રદૂષણ ચરમસીમાએ હોય, ત્યારે સત્ર યોજવું એ જીવનને જોખમમાં મૂકવા જેવું છે."