Google investment in India: દુનિયાની દિગ્ગજ ટેક કંપની Google ભારતમાં એક ખૂબ મોટું રોકાણ કરવા જઈ રહી છે. ગુગલ અને આલ્ફાબેટના CEO સુંદર પિચાઈએ ભારતમાં આગામી 5 વર્ષ માટે 15 બિલિયન ડોલર એટલે કે લગભગ 1.35 લાખ કરોડ રૂપિયાના રોકાણની જાહેરાત કરી છે. આ જંગી રોકાણ મુખ્યત્વે ભારતમાં AI (આર્ટિફિશિયલ ઇન્ટેલિજન્સ) ઇન્ફ્રાસ્ટ્રક્ચરને મજબૂત કરવા માટે કરવામાં આવશે.
Google ભારતમાં કરશે 1.35 લાખ કરોડનું મોટું રોકાણ: સમુદ્રની અંદર અમેરિકાથી વિશાખાપટ્ટનમ સુધી બિછાવાશે ફાઈબર કેબલ
Google investment in India: Google ભારતમાં AI અને ઇન્ફ્રાસ્ટ્રક્ચર માટે આગામી 5 વર્ષમાં $15 બિલિયન (1.35 લાખ કરોડ) નું રોકાણ કરશે. સુંદર પિચાઈએ અમેરિકાથી ભારત સુધી સબ-સી કેબલ નાખવાની મોટી જાહેરાત કરી છે.
MoneyControl Newsઅપડેટેડ Feb 20, 2026 પર 11:28 AM
નવી દિલ્હીમાં આયોજિત ‘AI Impact Summit'માં ભાગ લેવા પહોંચેલા સુંદર પિચાઈએ બુધવારે સવારે વડાપ્રધાન નરેન્દ્ર મોદી સાથે ખાસ મુલાકાત કરી હતી. આ બેઠકમાં ભારતમાં એઆઈ સેક્ટરના ભવિષ્ય અને તેમાં ગુગલના મોટા રોકાણ અંગે ચર્ચા કરવામાં આવી હતી.
અમેરિકાથી ભારત સુધી સમુદ્રમાં બિછાવાશે કેબલ
આ ઇવેન્ટમાં સુંદર પિચાઈ અને Google DeepMind ના CEO ડેમિસ હાસાબિસે (Demis Hassabis) એક ઐતિહાસિક જાહેરાત કરી. કંપની 'અમેરિકા-ઇન્ડિયા કનેક્ટ ઇનિશિયેટિવ' (US-India Connect Initiative) હેઠળ ભારત અને અમેરિકા વચ્ચે સમુદ્રની અંદર એક નવો સબ-સી (Sub-sea) ઓપ્ટિકલ ફાઈબર કેબલ રૂટ તૈયાર કરશે. આ કેબલ આંધ્રપ્રદેશના વિશાખાપટ્ટનમથી લઈને અમેરિકા સુધી જશે, જેથી બંને દેશો વચ્ચે સુપરફાસ્ટ એઆઈ કનેક્ટિવિટી મળી શકે.
પ્રોજેક્ટની મુખ્ય ખાસિયતો:
ગ્લોબલ નેટવર્ક એન્ટ્રી પોઇન્ટ: વિશાખાપટ્ટનમમાં નવું ઇન્ટરનેશનલ સબ-સી લેન્ડિંગ સ્ટેશન બનશે, જે ગુગલના ગ્લોબલ નેટવર્ક માટે ભારતમાં એન્ટ્રી પોઇન્ટ હશે.
અન્ય દેશો સાથે કનેક્શન: આ કેબલ નેટવર્ક દ્વારા સિંગાપોર, ઓસ્ટ્રેલિયા અને દક્ષિણ આફ્રિકાને પણ ભારત સાથે જોડવામાં આવશે.
દેશમાં 4 નવા રૂટ: ભારતમાં સ્થાનિક કનેક્ટિવિટી વધુ બહેતર બનાવવા ગુગલ 4 વધારાના ફાઈબર રૂટ ઉમેરશે.
AI પ્રોફેશનલ કોર્સ: સુંદર પિચાઈએ ભારતમાં નવો ‘AI Professional Certificate' પ્રોગ્રામ શરૂ કરવાની પણ જાહેરાત કરી છે, જેથી યુવાનોને એઆઈની સ્કીલ્સ શીખવીને માસ્ટર બનાવી શકાય.
ભારતને શું ફાયદો થશે?
ગુગલના આ 15 બિલિયન ડોલરના રોકાણથી દેશમાં નેટવર્ક કેપેસિટી અને ક્લાઉડ ઇન્ફ્રાસ્ટ્રક્ચર ખૂબ જ મજબૂત બનશે. વારંવાર થતા નેટવર્ક આઉટેજને રોકવામાં પણ તેનાથી મદદ મળશે. અત્યારે ભારતમાં ક્લાઉડ કમ્પ્યુટિંગ અને એઆઈ સર્વિસની માંગ ખૂબ ઝડપથી વધી રહી છે. સમુદ્રી કેબલ સિવાય ગુગલ ભારતમાં એવા ફિઝિકલ અને ડિજિટલ સિસ્ટમ પણ તૈયાર કરશે જે ડેટા સેન્ટર અને એઆઈ મોડલને ટ્રેન કરવામાં મદદરૂપ થશે.
Google દ્વારા કરવામાં આવતું આ લોન્ગ-ટર્મ રોકાણ માત્ર ભારતનું જ નહીં પરંતુ આસપાસના અન્ય દેશોનું પણ ડિજિટલ ભવિષ્ય બદલી નાખશે. સરકારી સંસ્થાઓ અને લોકલ ઇન્સ્ટિટ્યૂટ્સ સાથે મળીને ગુગલ દેશના નેશનલ રિસર્ચ અને એઆઈ સાયન્સ મોડલને એક નવી જ ઊંચાઈ પર લઈ જવાની તૈયારી કરી રહ્યું છે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.