ભારતની ગ્રીન એનર્જીમાં ઐતિહાસિક સિદ્ધિ: 2030નું લક્ષ્ય 2025માં જ હાંસલ!

Green Energy: ભારતે ગ્રીન એનર્જીના ક્ષેત્રમાં એક ઐતિહાસિક સિદ્ધિ હાંસલ કરી છે. નેશનલ ક્લાઈમેટ એક્શન પ્લાન હેઠળ 2030 સુધીમાં કુલ બિજળી ઉત્પાદન ક્ષમતામાં 50% નોન-ફોસિલ ફ્યુઅલ સોર્સનો હિસ્સો હાંસલ કરવાનું લક્ષ્ય હતું, જે ભારતે 2025માં જ પૂરું કરી લીધું છે. ન્યૂ એન્ડ રિન્યુએબલ એનર્જી મિનિસ્ટર પ્રલ્હાદ જોશીએ આ ઉપલબ્ધિની જાણકારી આપી છે.

ભારતની ઉપલબ્ધિ

હાલમાં ભારતની કુલ બિજળી ઉત્પાદન ક્ષમતા 484.8 ગીગાવોટ છે, જેમાંથી 242.8 ગીગાવોટ એટલે કે 50% બિજળી નોન-ફોસિલ સોર્સ જેવા કે સોલર, વિન્ડ અને હાઈડ્રો પાવરથી ઉત્પન્ન થઈ રહી છે. આ એક મોટી સફળતા છે, જે ભારતના ગ્રીન એનર્જી પ્રત્યેના સમર્પણને દર્શાવે છે.

મંત્રી પ્રલ્હાદ જોશીનું નિવેદન

સોમવારે સોશિયલ મીડિયા પ્લેટફોર્મ X પર પ્રલ્હાદ જોશીએ જણાવ્યું, “જ્યારે વિશ્વ ક્લાઈમેટ સોલ્યુશન્સની શોધમાં છે, ત્યારે ભારત રાહ બતાવી રહ્યું છે. દરેક ભારતીય માટે આ ગર્વની ક્ષણ છે કે ભારતે 50% બિજળી નોન-ફોસિલ ફ્યુઅલથી ઉત્પન્ન કરવાની ક્ષમતા હાંસલ કરી લીધી છે.” તેમણે વધુમાં કહ્યું કે, “પીએમ મોદીના નેતૃત્વમાં ભારતનું ગ્રીન ટ્રાન્સફોર્મેશન આગળ વધી રહ્યું છે, જે આત્મનિર્ભર અને સસ્ટેનેબલ ભવિષ્યનો માર્ગ બતાવે છે.”