Trump Tariff: ટ્રંપના 25% ટેરિફથી ભારતીય એક્સપોટર્સમાં છટણીનો ડર, સરકાર સાથે વાતચીત

Trump Tariff Indian Exports: અમેરિકાના રાષ્ટ્રપતિ ડોનાલ્ડ ટ્રંપે ભારતીય ચીજવસ્તુઓ પર 25%નો વ્યાપક ટેરિફ લાદવાનો નિર્ણય કર્યો છે, જેનાથી ભારતીય એક્સપોટર્સ માં મોટા પાયે છટણીનો ડર ફેલાયો છે. વ્હાઇટ હાઉસના એક એક્ઝિક્યુટિવ ઓર્ડર મુજબ, આ નવો ટેરિફ 7 ઓગસ્ટ 2025થી લાગુ થશે. આ ટેરિફ વિશ્વ વેપાર સંગઠનના હાલના ટેરિફ ઉપરાંત લાગશે, જોકે યુરોપિયન યુનિયનને ખાસ છૂટ આપવામાં આવી છે. ચીનને આ યાદીમાંથી બાકાત રાખવામાં આવ્યું છે, જેના પર 30% ટેરિફ યથાવત રહેશે. જોકે રશિયન ખરીદી માટે કોઈ દંડનો ઉલ્લેખ આ ઓર્ડરમાં નથી.

શું છે ટેરિફની વિગતો?

7 ઓગસ્ટ પહેલાં મોકલાયેલ અને 5 ઓક્ટોબર, 2025 સુધી અમેરિકા પહોંચતી ભારતીય ચીજવસ્તુઓ પર માત્ર 10%નો બેઝિક ટેરિફ લાગશે. જેમાં વાહનો, સ્ટીલ અને એલ્યુમિનિયમ જેવા ઉત્પાદનો પર પહેલાં જાહેર થયેલા પ્રાદેશિક ટેરિફ લાગશે. ફાર્મા, સેમિકન્ડક્ટર, ઇલેક્ટ્રોનિક ઉત્પાદનો, ક્રૂડ ઓઇલ અને કોલસા જેવા ઉર્જા ઉત્પાદનોને હાલ ટેરિફમાંથી છૂટ આપવામાં આવી છે.

ભારતીય નિકાસ પર અસર

ગ્લોબલ ટ્રેડ રિસર્ચ ઇનિશિએટિવ (GTRI)ના પ્રારંભિક અંદાજ મુજબ ભારતની ચીજવસ્તુઓનું નિકાસ નાણાકીય વર્ષ 2025માં 86.5 બિલિયન ડોલરથી 30% ઘટીને નાણાકીય વર્ષ 2026માં 60.6 બિલિયન ડોલર થઈ શકે છે. આ ઘટાડાનું મુખ્ય કારણ એ છે કે ભારત અને અમેરિકા 1 ઓગસ્ટ 2025ની સમયમર્યાદા પહેલાં વચગાળાના વેપાર કરારને અંતિમ સ્વરૂપ આપવામાં નિષ્ફળ રહ્યાં. અમેરિકાની કૃષિ અને ડેરી ક્ષેત્રોમાં વધુ બજાર પ્રવેશની માગણીએ આ કરારને અટકાવ્યો.

ટ્રંપનું બ્રિક્સ કનેક્શન

ટ્રંપે 25% ટેરિફ માટે ભારતની બ્રિક્સ સદસ્યતાને આંશિક રીતે જવાબદાર ગણાવી છે. અમેરિકાના વિદેશ મંત્રી માર્કો રુબિયોએ જણાવ્યું કે રશિયા સાથે ભારતના સંબંધો ભારત-અમેરિકા સંબંધોમાં ખટાશનું કારણ બન્યા છે. બીજી તરફ ભારતના વિદેશ મંત્રાલયે આ ટેરિફની સ્થિતિ પર સંયમિત પ્રતિક્રિયા આપી. મંત્રાલયના પ્રવક્તા રણધીર જયસ્વાલે કહ્યું, “ભારત અને અમેરિકાની ભાગીદારીએ અનેક ઉતાર-ચઢાવ અને પડકારોનો સામનો કર્યો છે. અમે બંને દેશોના પ્રતિબદ્ધ એજન્ડા પર ધ્યાન આપી રહ્યા છીએ અને અમને વિશ્વાસ છે કે આ સંબંધો આગળ વધશે.”