દિલ્હી લાલ કિલ્લા હુમલાનું પાકિસ્તાન કનેક્શન: UN રિપોર્ટમાં મોટો ખુલાસો, આતંકી સંગઠન જૈશનો હાથ હોવાનો દાવો

UN Report Pakistan Terror: ભારત હંમેશાથી કહેતું આવ્યું છે કે પાકિસ્તાન આતંકવાદનું કેન્દ્રબિંદુ છે અને હવે આ વાત પર ફરી એકવાર વિશ્વની સૌથી મોટી સંસ્થા સંયુક્ત રાષ્ટ્ર (UN) એ મહોર મારી છે. દિલ્હીના ઐતિહાસિક લાલ કિલ્લા નજીક થયેલા આતંકી હુમલાને લઈને યુએન સિક્યુરિટી કાઉન્સિલ (UNSC) ના તાજેતરના અહેવાલે પાકિસ્તાનની પોલ ખોલી નાખી છે. આ રિપોર્ટમાં સ્પષ્ટ કરવામાં આવ્યું છે કે હુમલા પાછળ પાકિસ્તાન સ્થિત કુખ્યાત આતંકી સંગઠન ‘જૈશ-એ-મોહમ્મદ' (JeM)નો હાથ હતો.

UN રિપોર્ટમાં શું ખુલાસો થયો?

સંયુક્ત રાષ્ટ્ર સુરક્ષા પરિષદની 1267 સેન્ક્શન્સ કમિટી દ્વારા એક રિપોર્ટ તૈયાર કરવામાં આવ્યો છે. આ રિપોર્ટ એનાલિટિકલ સપોર્ટ એન્ડ સેન્ક્શન્સ મોનિટરિંગ ટીમ દ્વારા બનાવવામાં આવ્યો છે. રિપોર્ટ મુજબ દિલ્હીમાં લાલ કિલ્લા પાસે થયેલા હુમલામાં સીધી રીતે જૈશ-એ-મોહમ્મદની સંડોવણી સામે આવી છે. એક સભ્ય દેશે આપેલી માહિતી મુજબ, જૈશ-એ-મોહમ્મદે ખુદ આ હુમલાની જવાબદારી સ્વીકારી હતી. પાકિસ્તાન વારંવાર એવો રાગ આલાપતું હોય છે કે તેમની જમીન પર કોઈ આતંકી ગતિવિધિ નથી થઈ રહી, પરંતુ UNના આ રિપોર્ટે પાકિસ્તાનના જુઠ્ઠાણાને ખુલ્લું પાડી દીધું છે.

મસૂદ અઝહરની નવી ખતરનાક ચાલ: ‘જમાત-ઉલ-મુમિનાત'

આ રિપોર્ટમાં માત્ર જૂના હુમલાની જ વાત નથી, પરંતુ ભવિષ્યના ખતરા વિશે પણ ચેતવણી આપવામાં આવી છે. આતંકી મસૂદ અઝહર હવે એક નવી રણનીતિ પર કામ કરી રહ્યો છે. મસૂદ અઝહરે 8 ઓક્ટોબરના રોજ મહિલાઓની એક અલગ વિંગ બનાવવાની જાહેરાત કરી છે. આ વિંગનું નામ 'જમાત-ઉલ-મુમિનાત' રાખવામાં આવ્યું છે. જોકે, આ નવું સંગઠન હજુ સુધી UN ની પ્રતિબંધિત યાદીમાં આવ્યું નથી, પરંતુ તેના પર આતંકી પ્રવૃત્તિઓને મદદ અને સમર્થન આપવાનો ગંભીર આરોપ છે.

કાશ્મીર અને લશ્કરના પ્રોક્સી સંગઠનો સક્રિય

UNના અહેવાલમાં જૈશ ઉપરાંત અન્ય આતંકી સંગઠનોની ગતિવિધિઓનો પણ ઉલ્લેખ કરવામાં આવ્યો છે. ખાસ કરીને લશ્કર-એ-તૈયબાના ઈશારે કામ કરતા પ્રોક્સી સંગઠન 'ધ રેઝિસ્ટન્સ ફ્રન્ટ' (TRF) વિશે પણ માહિતી આપવામાં આવી છે. એપ્રિલ 2025માં કાશ્મીરના પહેલગામમાં એક આતંકી હુમલો થયો હતો, જેમાં TRF નો હાથ હોવાનું રિપોર્ટમાં જણાવાયું છે. નોંધનીય છે કે, ભારતે આ તમામ હુમલાઓના જવાબમાં મે 2025 માં પાકિસ્તાન સ્થિત આતંકી ઠેકાણાઓ પર મોટી કાર્યવાહી કરી હતી. ભારતની આ કાર્યવાહીને આતંકી હુમલાઓના જડબાતોડ જવાબ તરીકે જોવામાં આવી રહી છે. ટૂંકમાં, આ રિપોર્ટ સાબિત કરે છે કે સરહદ પારથી હજુ પણ ભારત વિરુદ્ધ ષડયંત્રો રચાઈ રહ્યા છે અને પાકિસ્તાની ધરતીનો ઉપયોગ આતંકવાદ ફેલાવવા માટે થઈ રહ્યો છે.