PM નરેન્દ્ર મોદી લેશે ચીનની મુલાકાત, SCO સમિટમાં હાજરી આપે તેવી શક્યતા, ગાલવાન અથડામણ પછી આ પહેલી મુલાકાત

SCO Summit 2025: વડાપ્રધાન નરેન્દ્ર મોદી આ મહિનાના અંતમાં શાંઘાઈ કોઓપરેશન ઓર્ગેનાઈઝેશન (SCO) સમિટમાં ભાગ લેવા માટે ચીન જશે. ગલવાન ખીણમાં ભારતીય અને ચીની સૈનિકો વચ્ચે થયેલી અથડામણ બાદ પીએમ મોદી પહેલી વાર ચીનની મુલાકાતે છે. અહેવાલ મુજબ, પીએમ મોદી 31 ઓગસ્ટે ચીનની મુલાકાત લેશે. મીડિયા રિપોર્ટ્સ અનુસાર, વડાપ્રધાન મોદી 31 ઓગસ્ટથી 1 સપ્ટેમ્બર સુધી શાંઘાઈ કોઓપરેશન ઓર્ગેનાઈઝેશન (SCO) સમિટમાં ભાગ લેવા માટે ચીનની મુલાકાત લેશે. 2019 પછી પીએમ મોદીની આ પહેલી ચીનની મુલાકાત પણ હશે.

શું છે SCO સંગઠન?

શાંઘાઈ કોઓપરેશન ઓર્ગેનાઈઝેશન (SCO)ની સ્થાપના 2001માં ચીનના શાંઘાઈ શહેરમાં કરવામાં આવી હતી. આ સંગઠન દુનિયાનો એક પ્રભાવશાળી આર્થિક અને સુરક્ષા સમૂહ છે. આ સમૂહમાં ભારત, ચીન, રશિયા, પાકિસ્તાન, ઈરાન, કઝાકિસ્તાન, કિર્ગિસ્તાન, તાજિકિસ્તાન અને ઉઝબેકિસ્તાન જેવા દેશો સામેલ છે.

ઉલ્લેખનીય છે કે, SCOના સભ્ય દેશોમાં દુનિયાની લગભગ 40% વસ્તી રહે છે. આ દેશોનો વિશ્વની કુલ જીડીપીમાં લગભગ 20% હિસ્સો છે. આ સંસ્થાનું મુખ્ય કાર્ય સભ્ય દેશો વચ્ચે રાજકીય, આર્થિક અને સુરક્ષા સંબંધોને મજબૂત કરવાનું છે.