Old vehicles registration renewal: જૂના વાહનોનું રજિસ્ટ્રેશન રિન્યૂ કરાવવું પડશે મોંઘું, સરકારે ફીમાં કર્યો ભારે વધારો

Old vehicles registration renewal: સડક પરિવહન અને રાજમાર્ગ મંત્રાલયે 20 વર્ષથી જૂના વાહનોના રજિસ્ટ્રેશન રિન્યૂઅલની ફીમાં મોટો વધારો કર્યો છે. આ નિર્ણયનો મુખ્ય ઉદ્દેશ લોકોને જૂના વાહનોનો ઉપયોગ ઘટાડવા અને તેને સ્ક્રેપ કરવા માટે પ્રોત્સાહિત કરવાનો છે. જો તમારી પાસે 20 વર્ષથી જૂનું વાહન છે, તો હવે રજિસ્ટ્રેશન રિન્યૂ કરાવવા માટે તમારે વધુ ખર્ચ કરવો પડશે.

નવી ફી શું છે?

મંત્રાલયના તાજેતરના નોટિફિકેશન મુજબ, 20 વર્ષથી જૂના લાઇટ મોટર વ્હીકલ (LMV)ના રજિસ્ટ્રેશન રિન્યૂઅલની ફી 5000 રૂપિયાથી વધારીને 10,000 રૂપિયા કરવામાં આવી છે. બે પૈડાંવાળા વાહનો માટે ફી 1000 રૂપિયાથી વધારીને 2000 રૂપિયા, જ્યારે ત્રણ પૈડાં અને ક્વાડ્રિસાયકલ માટે 3500 રૂપિયાથી વધારીને 5000 રૂપિયા કરવામાં આવી છે.

આયાતી વાહનો પર પણ ફીમાં ભારે વધારો

આયાતી વાહનોના રજિસ્ટ્રેશન રિન્યૂઅલ માટે પણ ફીમાં નોંધપાત્ર વધારો થયો છે. આયાતી બે પૈડાં અને ત્રણ પૈડાંવાળા વાહનો માટે હવે 20,000 રૂપિયા, જ્યારે ચાર પૈડાં કે તેથી મોટા વાહનો માટે 80,000 રૂપિયાની ફી ચૂકવવી પડશે. આ નવા નિયમો ફેબ્રુઆરીમાં જાહેર કરાયેલા ડ્રાફ્ટને 21 ઓગસ્ટે અંતિમ સ્વરૂપ આપવામાં આવ્યું હતું. ઉલ્લેખનીય છે કે, મંત્રાલયે અગાઉ ઓક્ટોબર 2021માં પણ વાહન રજિસ્ટ્રેશન અને રિન્યૂઅલ ફીમાં વધારો કર્યો હતો.

સુપ્રીમ કોર્ટનો નિર્ણય

દિલ્હી-એનસીઆરમાં 10 વર્ષથી જૂની ડીઝલ ગાડીઓ અને 15 વર્ષથી જૂની પેટ્રોલ ગાડીઓના માલિકો સામે સખત કાર્યવાહી ન કરવા સુપ્રીમ કોર્ટે ઓગસ્ટની શરૂઆતમાં આદેશ આપ્યો હતો. દિલ્હી સરકારે કોર્ટમાં અપીલ કરી હતી કે વાહનોના ઉત્પાદન વર્ષને બદલે તેના વાસ્તવિક ઉપયોગને ધ્યાનમાં લઈને સ્ક્રેપ નીતિ લાગુ કરવામાં આવે.