POCSO કાયદાનો દુરુપયોગ રોકવા સુપ્રીમ કોર્ટની ચિંતા: કિશોરોના સંબંધો અને વૈવાહિક વિવાદોમાં થઈ રહ્યો છે ખોટો ઉપયોગ!

POCSO Act Supreme Court: સુપ્રીમ કોર્ટે મંગળવારે પોક્સો (બાળ યૌન અપરાધોથી સંરક્ષણ) કાયદાના દુરુપયોગ અંગે ગંભીર ચિંતા વ્યક્ત કરી છે. ન્યાયમૂર્તિ બી. વી. નાગરત્ના અને ન્યાયમૂર્તિ આર. મહાદેવનની બેન્ચે કહ્યું કે, “વૈવાહિક વિવાદોમાં અને કિશોરો વચ્ચે સહમતીથી બનેલા સંબંધોમાં પોક્સો કાયદાનો ખોટો ઉપયોગ થઈ રહ્યો છે.”

આ બાબતે બેન્ચે વધુમાં જણાવ્યું, “આપણે લોકોને, ખાસ કરીને છોકરાઓ અને પુરુષોને, આ કાયદાના જોગવાઈઓ વિશે જાગૃત કરવા પડશે.” કોર્ટ આ મામલે એક જાહેર હિતની અરજી (PIL) પર સુનાવણી કરી રહી હતી. આ અરજીમાં બળાત્કાર વિરોધી કાયદાઓ અને પોક્સો કાયદા વિશે લોકોને જાગૃત કરવા માટે સરકારને નિર્દેશ આપવાની માંગ કરવામાં આવી હતી.

કોર્ટે શું કહ્યું?

- વૈવાહિક વિવાદોમાં પોક્સોનો દુરુપયોગ થઈ રહ્યો છે.

- કિશોરો વચ્ચે સહમતીવાળા સંબંધોને પણ આ કાયદા હેઠળ ખોટી રીતે ફસાવવામાં આવે છે.

- છોકરાઓ અને પુરુષોમાં જાગૃતિની જરૂર છે.

કોર્ટે આ કેસની આગામી સુનાવણી 2 ડિસેમ્બર સુધી મુલતવી રાખી છે. કારણ કે, કેટલાક રાજ્યો અને કેન્દ્રશાસિત પ્રદેશોએ હજુ સુધી પોતાનો જવાબ દાખલ કર્યો નથી.