ટ્રમ્પનું ભારત પર 25% ટેરિફનું એલાન, PM મોદીને મિત્ર ગણાવ્યા પણ આપી આ મોટી ચેતવણી

Donald Trump India Tariff: અમેરિકી રાષ્ટ્રપતિ ડોનાલ્ડ ટ્રમ્પે ભારત પર 25% ટેરિફ (આયાત શુલ્ક) લગાવવાની જાહેરાત કરીને ફરી એકવાર ચર્ચામાં આવ્યા છે. આ સાથે તેમણે ભારતના વડાપ્રધાન નરેન્દ્ર મોદીને પોતાના મિત્ર ગણાવ્યા, પરંતુ વેપારના મુદ્દે ભારતની નીતિઓ પર સવાલ ઉઠાવ્યા. ટ્રમ્પનું કહેવું છે કે ભારતના ઊંચા ટેરિફને કારણે બંને દેશો વચ્ચે વેપાર ઓછો થઈ રહ્યો છે.

ટ્રમ્પનું નવું નિવેદન

ટ્રમ્પે જણાવ્યું, "PM મોદી મારા મિત્ર છે, પરંતુ વેપારની દૃષ્ટિએ ભારત અમેરિકા સાથે ખૂબ વેપાર કરતું નથી. ભારતના ટેરિફ દુનિયામાં સૌથી વધુ છે. અમે હાલ ભારત સાથે આ અંગે વાતચીત કરી રહ્યા છીએ, જોઈએ શું થાય છે." ANIના અહેવાલ મુજબ, ટ્રમ્પે કહ્યું કે ભારત દુનિયાના સૌથી વધુ ટેરિફ લગાવનારા દેશોમાંનું એક છે, પરંતુ તેઓ ટેરિફ ઘટાડવા માટે તૈયાર લાગે છે.

રશિયા સાથે ભારતની નિકટતા પર ટ્રમ્પની નારાજગી

ટ્રમ્પે બુધવારે જણાવ્યું હતું કે ભારત પર 25% ટેરિફ ઉપરાંત રશિયન તેલ અને સૈન્ય સાધનોની ખરીદીને કારણે વધારાનો આયાત શુલ્ક પણ લાગુ કરવામાં આવશે. APના અહેવાલ મુજબ, ટ્રમ્પનું કહેવું છે કે ભારતની આ ખરીદી યુક્રેનમાં રશિયાના યુદ્ધને સમર્થન આપે છે. આ અંતર્ગત તેઓ શુક્રવારથી ઘણા દેશો પર સંશોધિત ટેરિફ લાગુ કરશે અને વધારાનો "જુર્માનો" પણ વસૂલશે.

ભારતના વાણિજ્ય મંત્રાલયનો જવાબ

ભારતના વાણિજ્ય મંત્રાલયે આ ઘોષણાને પગલે નિવેદન આપ્યું છે કે ભારત અને અમેરિકા છેલ્લા કેટલાક મહિનાઓથી "ન્યાયી, સંતુલિત અને પરસ્પર લાભદાયી" દ્વિપક્ષીય વેપાર સમજૂતી માટે વાતચીત કરી રહ્યા છે. નવી દિલ્હી આ લક્ષ્ય માટે પ્રતિબદ્ધ છે. એક ભારતીય અધિકારીએ જણાવ્યું કે આ નવા ટેરિફથી 2030 સુધીમાં બંને દેશો વચ્ચે દ્વિપક્ષીય વેપારને 500 બિલિયન ડોલર સુધી બમણો કરવાનું લક્ષ્ય જટિલ બની શકે છે.