ટ્રમ્પનો ભારતને ટેરિફ 'લોલીપોપ'? 50% ટેરિફ ઘટાડવાના સંકેત પાછળનું રાજકારણ શું છે? જાણો નિષ્ણાતો શું કહી રહ્યાં છે?

US-India Trade: ભારત અને અમેરિકા વચ્ચેના વેપાર સંબંધોમાં ફરી એકવાર ગરમાવો જોવા મળી રહ્યો છે. અમેરિકી રાષ્ટ્રપતિ ડોનાલ્ડ ટ્રમ્પે તાજેતરમાં એક એવું નિવેદન આપ્યું છે, જેણે આંતરરાષ્ટ્રીય વ્યાપાર જગતમાં ચર્ચા જગાવી છે. ટ્રમ્પે સંકેત આપ્યો છે કે ભારત પર લાદવામાં આવેલા 50% ભારેખમ ટેરિફ "કોઈક દિવસ" ઓછા કરવામાં આવી શકે છે. આ નિવેદનથી ભારતમાં થોડો ઉત્સાહ જરૂર દેખાયો, પરંતુ રાજદ્વારી નિષ્ણાતો તેને ટ્રમ્પની વધુ એક રાજકીય ચાલ માની રહ્યા છે.

ટ્રમ્પે કહ્યું કે ભારત પર આટલી ઊંચી ડ્યુટી એટલા માટે હતી કારણ કે ભારત રશિયા પાસેથી તેલ આયાત કરી રહ્યું હતું. તેમણે ઉમેર્યું, "હવે ભારતે રશિયાથી તેલ લેવાનું ઘણું ઓછું કરી દીધું છે. હા, અમે ટેરિફ ઘટાડવા જઈ રહ્યા છીએ... કોઈક સમયે તેને હટાવી દઈશું." સવાલ એ ઊભો થાય છે કે શું આ ખરેખર પોલીસીમાં ફેરફારનો સંકેત છે કે પછી માત્ર શબ્દોની રમત?

આ સમગ્ર મામલે ભારતના પૂર્વ વિદેશ સચિવ કંવલ સિબ્બલે બહુ મોટી અને સ્પષ્ટ વાત કહી છે. તેમનું માનવું છે કે ટ્રમ્પની વાતોને બહુ ગંભીરતાથી લેવાની જરૂર નથી. સિબ્બલે કટાક્ષ કરતા કહ્યું કે વ્હાઇટ હાઉસમાં કોઈ પણ જરૂરી કામ ત્યાં સુધી નથી થતું જ્યાં સુધી પહેલા ટ્રમ્પની 'ચાપલૂસી' ન કરવામાં આવે.

કંવલ સિબ્બલના મતે, ટ્રમ્પ અવારનવાર વિદેશી નેતાઓની પ્રશંસા કરતા રહે છે, પરંતુ તેમના શબ્દો અને તેમના નિર્ણયો વચ્ચે બહુ ઓછો મેળ હોય છે. તેમણે કહ્યું કે ટ્રમ્પે ભારત અને વડાપ્રધાન મોદી વિશે ઘણી સારી વાતો કહી છે, પરંતુ વાસ્તવિકતા એ છે કે 50% ટેરિફ હજુ પણ યથાવત છે. સિબ્બલનું માનવું છે કે ટ્રમ્પ દ્વારા થતી આવી પ્રશંસા ખરેખર તો તેમની પોતાની પ્રશંસા કરવાની એક રીત છે, જેના દ્વારા તે દુનિયાને બતાવવા માંગે છે કે તેઓ કેટલા પ્રભાવશાળી અને મૈત્રીપૂર્ણ નેતા છે.