Cabinet Decisions: ખેડૂતો અને નાના વેપારીઓને મોદી સરકારની મોટી ભેટ, રવિ પાક માટે 62,370 કરોડની ખાતર સબસિડી અને 5,000 કરોડના મુદ્રા ફંડને મંજૂરી

કેવી રીતે નક્કી થાય છે સબસિડી?: આ યોજના હેઠળ કેન્દ્ર સરકાર દરેક પાકની સીઝન માટે અલગ-અલગ પોષક તત્વો પર સબસિડીના દરો નક્કી કરે છે. આ દરો નક્કી કરતી વખતે ખાતર અને તેના ઉત્પાદનમાં વપરાતી સામગ્રીની વર્તમાન સ્થાનિક અને આંતરરાષ્ટ્રીય કિંમતોને ધ્યાનમાં રાખવામાં આવે છે. ખેડૂતોને વાજબી ભાવે ખાતર મળી રહે તે માટે ખાતર ઉત્પાદકો અને આયાતકારોને આ સબસિડી આપવામાં આવે છે.

અગાઉ કેટલી મળી હતી સબસિડી?: વર્ષ 2025-26 ની ગઈ રવિ સીઝન માટે સરકારે આશરે 37,952 કરોડની સબસિડી મંજૂર કરી હતી. ત્યારબાદ કેબિનેટે ખરીફ 2026 સીઝન માટે આશરે 41,534 કરોડની મંજૂરી આપી હતી.

કયા પાકોને થશે ફાયદો?: સરકારની ખાતર સબસિડી યોજનામાં ઘઉં, કઠોળ અને તેલીબિયાં જેવા રવિ પાકોની ખેતીમાં વપરાતા મુખ્ય કૃષિ ઈનપુટ્સનો સમાવેશ થાય છે.

2. મુદ્રા યોજના હેઠળ 5,000 કરોડનું ક્રેડિટ ગેરંટી ફંડ

ખેડૂતો ઉપરાંત મંત્રીમંડળે પ્રધાનમંત્રી મુદ્રા યોજના હેઠળ 5,000 કરોડના 'ક્રેડિટ ગેરંટી ફંડ'ને પણ મંજૂરી આપી દીધી છે. એપ્રિલ 2015 માં શરૂ કરવામાં આવેલી આ યોજના બેંકો, નોન-બેંકિંગ ફાઈનાન્શિયલ કંપનીઓ અને અન્ય ધિરાણ આપતી સંસ્થાઓ મારફતે નાના વેપારીઓ અને માઈક્રો એન્ટરપ્રાઈઝને સંસ્થાકીય લોન અપાવવામાં મદદ કરે છે.

'નેશનલ ક્રેડિટ ગેરંટી ટ્રસ્ટી કંપની' દ્વારા સંચાલિત આ ફંડ પાત્ર ધિરાણકર્તાઓને માઈક્રો એન્ટરપ્રાઈઝ સાથે જોડાયેલી લોન ડિફોલ્ટ થવાની સ્થિતિમાં સુરક્ષા કવચ પૂરું પાડે છે. સરકારની આ ક્રેડિટ ગેરંટી સ્કીમનો મુખ્ય ઉદ્દેશ્ય નાના લોનધારકોને કોઈપણ મિલકત ગીરવે મૂક્યા વગર લોન આપવામાં મદદ કરવાનો છે.

3. 'યુગે યુગીન ભારત મ્યુઝિયમ' માટે 3,230 કરોડ મંજૂર: પેરિસના લૂવ્ર કરતા પણ હશે મોટું

આર્થિક બાબતોની કેબિનેટ સમિતિએ નવી દિલ્હીમાં આવેલા ઐતિહાસિક નોર્થ અને સાઉથ બ્લોકનું સ્વરૂપ બદલીને ત્યાં 'યુગે યુગીન ભારત સંગ્રહાલય' વિકસાવવા માટે 3,230 કરોડની મંજૂરી આપી છે.

વિશ્વનું સૌથી મોટું મ્યુઝિયમ: કેન્દ્રીય મંત્રી અશ્વિની વૈષ્ણવે જણાવ્યું કે આ સંગ્રહાલય ભારતની ભવ્ય સાંસ્કૃતિક યાત્રાને પ્રદર્શિત કરશે અને તે પેરિસના વિશ્વ પ્રસિદ્ધ 'લૂવ્ર'મ્યુઝિયમ કરતા પણ મોટું હશે.

રોજ 30,000 મુલાકાતીઓની ક્ષમતા: આ સૂચિત મ્યુઝિયમ આશરે 1.79 લાખ ચોરસ મીટરમાં ફેલાયેલું હશે અને તેને એવી રીતે ડિઝાઈન કરવામાં આવી રહ્યું છે કે અહીં દરરોજ અંદાજે 30,000 મુલાકાતીઓ આવી શકે.

ક્યારે શરૂ થશે?: આ પ્રોજેક્ટની જાહેરાત સૌપ્રથમ મે 2023 માં કરવામાં આવી હતી. ફેબ્રુઆરી 2026 માં કેબિનેટે સરકારી કચેરીઓને નોર્થ અને સાઉથ બ્લોકમાંથી નવી વહીવટી ઈમારતોમાં ખસેડવાની મંજૂરી આપી હતી, જેનાથી આ ઐતિહાસિક ઈમારતોને મ્યુઝિયમમાં બદલવાનો રસ્તો સાફ થઈ ગયો હતો.

18 લાખ ઐતિહાસિક વસ્તુઓ: સંસ્કૃતિ મંત્રાલયના જણાવ્યા અનુસાર, આ મ્યુઝિયમનું કામ નાણાકીય વર્ષ 2027 થી નાણાકીય વર્ષ 2031 વચ્ચે અનેક તબક્કામાં પૂર્ણ કરવામાં આવશે. સજાવટ પર કેન્દ્રિત પ્રથમ ગેલેરી વર્ષ 2027 ના અંત સુધીમાં ખુલી જવાની આશા છે. મંત્રાલયે દેશના વિવિધ સંગ્રહાલયોમાંથી આશરે 18 લાખ વસ્તુઓની ઓળખ કરી છે, જેને અહીં પ્રદર્શિત કરવામાં આવશે.

આ પણ વાંચો-ભારતના વિકાસ દર પર મૂડીઝે વ્યક્ત કર્યો મોટો ભરોસો, નાણાકીય વર્ષ 2026-27 માટે GDP ગ્રોથનું અનુમાન વધારીને 7% કર્યું