Trump on Foreign Students Policy: અમેરિકાના રાષ્ટ્રપતિ ડોનાલ્ડ ટ્રમ્પે આંતરરાષ્ટ્રીય વિદ્યાર્થીઓના પ્રવેશને સમર્થન આપીને પોતાના પરંપરાગત વલણથી અલગ સૂર વ્યક્ત કર્યો છે. ટ્રમ્પના મતે, વિદેશી વિદ્યાર્થીઓને અમેરિકામાં અભ્યાસની મંજૂરી આપવી તે માત્ર શિક્ષણ પ્રણાલી માટે જ નહીં, પણ દેશના અર્થતંત્ર માટે પણ ખૂબ જ ફાયદાકારક છે.
ટ્રમ્પના સૂર બદલાયા: ‘વિદેશી વિદ્યાર્થીઓ અમેરિકાની આવક માટે સારા, નહીં તો અડધી યુનિવર્સિટીઓ થઈ જશે બંધ’
Trump on Foreign Students Policy: અમેરિકન પ્રમુખ ડોનાલ્ડ ટ્રમ્પે વિદેશી વિદ્યાર્થીઓને મંજૂરી આપવાના પગલાને સમર્થન આપ્યું છે. તેમણે ચેતવણી આપી કે જો વિદેશી વિદ્યાર્થીઓનો પ્રવાહ ઘટશે તો અમેરિકાની અડધી યુનિવર્સિટીઓ બંધ થઈ જશે. જાણો આ મુદ્દે તેમનો બદલાયેલો દૃષ્ટિકોણ અને નવી નીતિના પ્રસ્તાવો.
MoneyControl Newsઅપડેટેડ Nov 12, 2025 પર 12:10 PM
યુનિવર્સિટીઓ પર સંકટની ચેતવણી
એક તાજેતરના ઇન્ટરવ્યૂમાં ડોનાલ્ડ ટ્રમ્પે ભારક ચેતવણી આપી હતી કે જો વિદેશી વિદ્યાર્થીઓના પ્રવેશમાં કાપ મૂકવામાં આવશે, તો અમેરિકાની ઘણી યુનિવર્સિટીઓ ‘તબાહ’ થઈ જશે અને બંધ થવાની કગાર પર આવી જશે. તેમણે સ્પષ્ટપણે કહ્યું, "વિશ્વભરમાંથી આવતા વિદ્યાર્થીઓને રોકવા ન જોઈએ, કારણ કે આપણે આખી દુનિયા સાથે તાલમેલ જાળવીને ચાલવું જોઈએ." ટ્રમ્પનો દાવો છે કે ખાસ કરીને ચીન અને અન્ય દેશોના વિદ્યાર્થીઓની સંખ્યા ઘટવાથી અમેરિકાની લગભગ 50 ટકા યુનિવર્સિટીઓ બંધ થવાની સંભાવના છે.
ટ્રિલિયન ડૉલરનું આર્થિક યોગદાન
ટ્રમ્પે આંતરરાષ્ટ્રીય વિદ્યાર્થીઓના આર્થિક યોગદાન પર ભાર મૂકતા જણાવ્યું કે આ વિદ્યાર્થીઓ અમેરિકન અર્થતંત્રમાં ટ્રિલિયન ડૉલરનું યોગદાન આપે છે. તેઓ સ્થાનિક વિદ્યાર્થીઓ કરતાં બમણી ફી ભરે છે, જે યુનિવર્સિટીઓ માટે આવકનો મુખ્ય સ્ત્રોત છે. ટ્રમ્પે કહ્યું, "હું આપણી શિક્ષણ પ્રણાલીને વિકસતી જોવા માંગુ છું. આ માત્ર વિદ્યાર્થીઓને બોલાવવાનો નહીં, પણ એક બિઝનેસ મૉડલનો મુદ્દો છે."
જ્યારે તેમને સૂચન મળ્યું કે વિદેશી વિદ્યાર્થીઓની સંખ્યા ઘટાડવાથી અમેરિકન વિદ્યાર્થીઓ માટે બેઠકો વધશે, ત્યારે ટ્રમ્પે અસહમતિ વ્યક્ત કરી. તેમણે ચેતવણી આપી કે આવું કરવાથી ખાસ કરીને નાની કૉલેજો અને બ્લેક હિસ્ટોરિકલ યુનિવર્સિટીઝ (HBCUs) ને ભારે આર્થિક નુકસાન થશે.
કડક વિઝા નીતિ છતાં બદલાયેલા સૂર
નોંધનીય છે કે ટ્રમ્પનું આ સમર્થન એવા સમયે આવ્યું છે જ્યારે તેમના જ પ્રશાસને આંતરરાષ્ટ્રીય વિદ્યાર્થીઓ માટે વિઝા નિયમો કડક કર્યા છે. કડક નિયમોના કારણે હજારો વિઝા રદ કરવામાં આવ્યા છે, અને પ્રો-પેલેસ્ટાઇન પ્રવૃત્તિઓ જેવી બાબતોને લઈને કેટલાક વિદેશી વિદ્યાર્થીઓની ધરપકડ અને દેશનિકાલના કિસ્સા પણ સામે આવ્યા છે. બીજી તરફ, વિદેશ મંત્રી માર્કો રૂબિયોએ આ વર્ષની શરૂઆતમાં વિદ્યાર્થી વિઝા ઇન્ટરવ્યૂ પર અસ્થાયી રોક લગાવવાનો નિર્દેશ આપ્યો હતો.
નવી પોલીસીનો પ્રસ્તાવ: મર્યાદા નક્કી કરવાની યોજના
વહીવટીતંત્ર હાલમાં 'કૉમ્પેક્ટ ફોર એકેડેમિક એક્સેલન્સ ઇન હાયર એજ્યુકેશન' નામની એક નવી નીતિ પર કામ કરી રહ્યું છે. આ પ્રસ્તાવ હેઠળ:
1. વિદેશી વિદ્યાર્થીઓની સંખ્યા કુલ અંડરગ્રેજ્યુએટ પ્રવેશના 15 ટકા સુધી મર્યાદિત રાખવાની યોજના છે.
2. કોઈ એક દેશમાંથી 5 ટકા થી વધુ વિદ્યાર્થીઓને મંજૂરી ન આપવાની દરખાસ્ત છે.
જોકે, અમેરિકાની ઘણી ટોચની સંસ્થાઓ આ પ્રસ્તાવનો સખત વિરોધ કરી રહી છે, કારણ કે તેઓ માને છે કે આનાથી શિક્ષણ અને આવક બંને પર નકારાત્મક અસર પડશે. ડોનાલ્ડ ટ્રમ્પના આ નિવેદનથી અમેરિકન શિક્ષણ જગતમાં એક નવી ચર્ચા શરૂ થઈ છે, જ્યાં આર્થિક હિતો અને ઇમિગ્રેશન નીતિઓ વચ્ચે સંતુલન જાળવવાનો પડકાર સામે આવ્યો છે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.