India-Ukraine: ઝેલેન્સ્કીએ PM મોદીને કેમ કહ્યું ‘થેન્ક્યુ’? સાથે કહ્યું યુક્રેનને ભારત પર પુરો ભરોસો

Russia-Ukraine war: યુક્રેનના રાષ્ટ્રપતિ વોલોદિમિર ઝેલેન્સ્કીએ ભારતના વડાપ્રધાન નરેન્દ્ર મોદીને યુક્રેનના સ્વતંત્રતા દિવસ નિમિત્તે શુભેચ્છા પાઠવવા બદલ આભાર માન્યો છે. સોશિયલ મીડિયા પ્લેટફોર્મ X પર ઝેલેન્સ્કીએ લખ્યું, “PM મોદી, યુક્રેનના સ્વતંત્રતા દિવસની હાર્દિક શુભેચ્છાઓ માટે આભાર. અમે શાંતિ અને સંવાદ માટે ભારતના સમર્પણની પ્રશંસા કરીએ છીએ.”

યુદ્ધના અંત માટે ભારતની ભૂમિકા પર ભરોસો

ઝેલેન્સ્કીએ વધુમાં જણાવ્યું કે રશિયા-યુક્રેન યુદ્ધને શાંતિપૂર્ણ રીતે સમાપ્ત કરવામાં ભારતના યોગદાન પર યુક્રેન ભરોસો રાખે છે. તેમણે લખ્યું, “આ ભયંકર યુદ્ધને ગૌરવ અને શાંતિ સાથે સમાપ્ત કરવા વિશ્વના પ્રયાસોમાં ભારતની ભૂમિકા મહત્વપૂર્ણ છે. ડિપ્લોમસીને મજબૂત કરતો દરેક નિર્ણય યુરોપ, હિંદ-પ્રશાંત અને વૈશ્વિક સ્તરે સુરક્ષા વધારશે.”

ટ્રમ્પના ટેરિફનો મુદ્દો

આ નિવેદન એવા સમયે આવ્યું છે જ્યારે રશિયન તેલની ખરીદીને લઈને અમેરિકાના રાષ્ટ્રપતિ ડોનાલ્ડ ટ્રમ્પે ભારત પર ‘દંડાત્મક’ ટેરિફ લાદવાની સમયમર્યાદા નજીક આવી રહી છે. આ પરિસ્થિતિ રશિયા અને યુક્રેન વચ્ચે ચાલી રહેલા યુદ્ધના સંદર્ભમાં ભારતની નીતિને વધુ જટિલ બનાવે છે.

PM મોદીનો પત્ર અને કીવની યાત્રાનો ઉલ્લેખ

ઝેલેન્સ્કીએ PM મોદી તરફથી મળેલા એક પત્રનો પણ X પર ઉલ્લેખ કર્યો, જેમાં મોદીએ ભારતના સ્વતંત્રતા દિવસની શુભેચ્છાઓ માટે આભાર માન્યો હતો. મોદીએ પોતાના પત્રમાં યુક્રેનના લોકોને તેમના સ્વતંત્રતા દિવસની શુભકામનાઓ પાઠવી હતી અને ગયા વર્ષે કીવની તેમની યાત્રાને યાદ કરી હતી.