બે દિવસમાં સેન્સેક્સ-નિફ્ટીમાં મોટો ઉછાળો, શું ભારતીય બજારના 'અચ્છે દિન' પાછા આવી ગયા?

ભારતીય શેરબજારમાં છેલ્લા બે દિવસથી જબરદસ્ત તોફાની તેજી જોવા મળી રહી છે. અમેરિકા અને ઈરાન વચ્ચે થયેલી ડીલના સમાચારોથી બજારના મુખ્ય ઇન્ડેક્સ સેન્સેક્સ અને નિફ્ટીને જાણે પાંખો આવી ગઈ છે. 15 જૂન બાદ 16 જૂને પણ આ તેજીનો સિલસિલો યથાવત રહ્યો હતો. 16 જૂનના રોજ નિફ્ટી 0.57 ટકા ઉછળીને 23,989 પર બંધ થયો. જ્યારે સેન્સેક્સ 0.71 ટકાના વધારા સાથે 76,808 ના સ્તરે ક્લોઝ થયો. આ તેજી જોઈને રોકાણકારોના મનમાં એક જ સવાલ છે કે, શું હવે ભારતીય બજારના સારા દિવસો પાછા આવી ગયા છે?

એમકે રિસર્ચનો નિફ્ટી માટે 29,000 નો ટાર્ગેટ

જાણીતી બ્રોકરેજ ફર્મ એમકે રિસર્ચએ માર્ચ 2027 માટે નિફ્ટીનો પોતાનો 29,000 નો ટાર્ગેટ જાળવી રાખ્યો છે. ફર્મનું કહેવું છે કે બજારમાં તેજી પાછળ ત્રણ મુખ્ય કારણો છે: કાચા તેલની કિંમતોમાં આવેલો ઘટાડો, માર્કેટમાં વધી રહેલી લિક્વિડિટી અને કંપનીઓની કમાણીનો શાનદાર ગ્રોથ. આ કારણોસર બજારમાં તેજીનો માહોલ આગળ પણ ચાલુ રહી શકે છે.

જોકે, બીજી તરફ ગ્લોબલ બ્રોકરેજ જેફરીઝ નું માનવું છે કે અન્ય ઉભરતા બજારોની સરખામણીમાં ભારતીય બજાર હજુ પણ મોંઘું છે. જેના કારણે વિદેશી રોકાણકારો હાલ તરત મોટા પાયે પાછા ફરશે કે કેમ તે અંગે થોડી શંકા છે.

ક્રૂડ ઓઈલનો ભાવ 75 થી 80 ડોલર પર આવશે

એમકે રિસર્ચના જણાવ્યા અનુસાર, અમેરિકા-ઈરાન ડીલથી વૈશ્વિક વેપાર માટે મહત્વનો એવો 'સ્ટ્રેટ ઓફ હોર્મુઝ' રસ્તો ખુલી જશે. આનાથી કાચા તેલના ભાવ અત્યારથી જ ઘટવા લાગ્યા છે. કાચું તેલ સસ્તું થવું એ ભારતના આર્થિક ભવિષ્ય માટે ખૂબ જ પોઝિટિવ વાત છે.

બ્રોકરેજે અંદાજ લગાવ્યો છે કે આગામી સમયમાં ક્રૂડનો ભાવ 75 થી 80 ડોલર પ્રતિ બેરલની વચ્ચે આવી શકે છે. જે એપ્રિલ અને મે મહિનાના સરેરાશ 103 ડોલરના ભાવ કરતા ઘણો ઓછો છે. આ ઘટાડાથી માત્ર ભારતની વ્યાપાર ખાધ જ નહીં ઘટે, પરંતુ મોંઘવારી વધવાનું જોખમ પણ ઓછું થઈ જશે.