ધર્મ બદલીને અનામત લેનારાઓ સાવધાન! સરકારી નોકરી જઈ શકે છે, દેશભરમાં શરૂ થશે મોટું અભિયાન

Reservation Policy India: જે લોકોએ પોતાનો ધર્મ બદલીને, ખાસ કરીને ખ્રિસ્તી ધર્મ અપનાવીને અનુસૂચિત જાતિ (SC)ના અનામતનો લાભ લીધો છે, તેમની સરકારી નોકરી હવે જોખમમાં મુકાઈ શકે છે. રાષ્ટ્રીય અનુસૂચિત જાતિ આયોગ (NCSC) આવા લોકોને શોધવા માટે દેશવ્યાપી અભિયાન શરૂ કરવાની તૈયારીમાં છે, જેનો મુખ્ય હેતુ અનામતના દુરુપયોગને રોકવાનો છે.

શા માટે આ અભિયાન શરૂ કરવામાં આવ્યું?

ભારતના બંધારણ મુજબ, અનુસૂચિત જાતિ (SC) માટેનું અનામત ફક્ત હિન્દુ, શીખ અથવા બૌદ્ધ ધર્મનું પાલન કરતા લોકો માટે જ છે. જો કોઈ વ્યક્તિ અન્ય કોઈ ધર્મ, જેમ કે ખ્રિસ્તી કે ઇસ્લામ, અપનાવે છે, તો તે કાયદાકીય રીતે SC અનામતનો લાભ મેળવવા માટે અયોગ્ય બની જાય છે.

છેલ્લા કેટલાક સમયથી NCSCને ઘણા રાજ્યોમાંથી એવી ફરિયાદો મળી રહી હતી કે મોટી સંખ્યામાં લોકોએ ખ્રિસ્તી ધર્મ અપનાવ્યા પછી પણ પોતાના જૂના જાતિ પ્રમાણપત્રનો ઉપયોગ કરીને સરકારી નોકરીઓ અને શૈક્ષણિક સંસ્થાઓમાં પ્રવેશ મેળવ્યો છે. આ ગેરરીતિને રોકવા માટે આયોગે આ કડક પગલું ભરવાનો નિર્ણય કર્યો છે.

આયોગની કાર્યવાહી શું હશે?

એક રિપોર્ટ અનુસાર, NCSC તમામ રાજ્ય સરકારોને પત્ર લખીને તેમના સરકારી વિભાગો અને શૈક્ષણિક સંસ્થાઓમાં જાતિ પ્રમાણપત્રોની સઘન તપાસ કરવા માટે નિર્દેશ આપશે. આયોગના અધ્યક્ષ કિશોર મકવાણાએ જણાવ્યું કે, "અમે રાજ્યોને રેકોર્ડ તપાસવા અને ધર્મ બદલ્યા છતાં અનામતનો લાભ લેનારા લોકોની ઓળખ કરવા માટે કહી રહ્યા છીએ."

આયોગ લાંબા ગાળે એક એવું 'રિપોર્ટિંગ સિસ્ટમ' બનાવવા માંગે છે, જેનાથી રાજ્યો સતત આવી ગેરરીતિઓ પર નજર રાખી શકે અને તેનો ડેટા આયોગ સાથે શેર કરી શકે.