ભારત-બાંગ્લાદેશ તણાવ વચ્ચે રશિયાની એન્ટ્રી: કહ્યું- ‘વહેલી તકે સમાધાન કરો’, જાણો હિંસા પાછળનું કડવું સત્ય

Bangladesh India Relations: બાંગ્લાદેશ હાલમાં ગંભીર રાજકીય અને સામાજિક અસ્થિરતાના સમયગાળામાંથી પસાર થઈ રહ્યું છે. એક તરફ દેશમાં લઘુમતીઓ પર હુમલા અને ભારત વિરોધી સૂત્રોચ્ચારોએ જોર પકડ્યું છે, તો બીજી તરફ આગામી ચૂંટણીઓને લઈને અનિશ્ચિતતાનું વાતાવરણ સર્જાયું છે. આ નાજુક પરિસ્થિતિમાં હવે રશિયાએ દરમિયાનગીરી કરી છે અને પડોશી દેશો વચ્ચેના સંબંધો સુધારવા માટે મહત્ત્વની સલાહ આપી છે.

રશિયાની સલાહ: ‘તણાવ ઘટાડવો જ સમજદારી છે’

બાંગ્લાદેશમાં સ્થિત રશિયન રાજદૂત અલેક્ઝાન્ડર ગ્રિગોરીવિચ ખોજિને સોમવારે વર્તમાન પરિસ્થિતિ પર ચિંતા વ્યક્ત કરતા બંને દેશોને શાંતિ જાળવવા અપીલ કરી હતી. તેમણે સ્પષ્ટ શબ્દોમાં જણાવ્યું હતું કે, ભારત અને બાંગ્લાદેશ વચ્ચેનો તણાવ જેટલી વહેલી તકે ઓછો થાય તેટલું બંને દેશોના હિતમાં છે. તેમણે ખાસ ભાર મૂક્યો કે આગામી 12 ફેબ્રુઆરીએ યોજાનારી રાષ્ટ્રીય ચૂંટણી પૂર્વે બંને પક્ષો વચ્ચે ‘ભરોસો અને વિશ્વાસ’નું વાતાવરણ હોવું અત્યંત જરૂરી છે. જોકે, તેમણે સ્પષ્ટતા કરી હતી કે રશિયા આ બાંગ્લાદેશનો આંતરિક મામલો હોવાથી તેમાં સીધી દખલગીરી કરશે નહીં, પરંતુ સ્થિતિ વધુ વણસે નહીં તે જોવું જરૂરી છે.

હિંસા પાછળ સત્તા ટકાવવાનું ષડયંત્ર?

દેશની વણસતી જતી પરિસ્થિતિ પાછળ બાંગ્લાદેશના પૂર્વ મંત્રી મોહિબુલ હસન ચૌધરીએ એક ચોંકાવનારો દાવો કર્યો છે. તેમના જણાવ્યા અનુસાર, ઢાકા અને ચટગાંવ જેવા મુખ્ય શહેરોમાં ફેલાયેલી અંધાધૂંધી અને હિંસા આપમેળે નથી થઈ રહી, પરંતુ તેની પાછળ વર્તમાન સરકારનો જ હાથ હોઈ શકે છે. ચૌધરીએ આરોપ લગાવ્યો છે કે સરકાર પોતાની સત્તા ટકાવી રાખવા અને ચૂંટણીઓને પાછળ ઠેલવા માટે જાણીજોઈને અશાંતિ ફેલાવી રહી છે. આ માટે ‘હિઝબ ઉત-તહરિર’ અને ‘શિબિર’ જેવા કટ્ટરપંથી સંગઠનોનો ઉપયોગ કરવામાં આવી રહ્યો છે, જેઓ સોશિયલ મીડિયા અને યુટ્યુબના માધ્યમથી લોકોને ઉશ્કેરવાનું કામ કરે છે.

મજબૂરીનો લાભ: મદરેસાના વિદ્યાર્થીઓનો દુરુપયોગ

બાંગ્લાદેશમાં જોવા મળતા ભારત વિરોધી પ્રદર્શનોનું સત્ય કંઈક અલગ જ હોવાનું સામે આવ્યું છે. પૂર્વ મંત્રીના ખુલાસા મુજબ, આ વિરોધ પ્રદર્શનો સમગ્ર દેશમાં નહીં પરંતુ અમુક ચોક્કસ વિસ્તારો પૂરતા મર્યાદિત છે. સૌથી આઘાતજનક બાબત એ છે કે કટ્ટરપંથીઓ દ્વારા મદરેસાના નિર્દોષ વિદ્યાર્થીઓને બળજબરીથી આ સરઘસોમાં સામેલ કરવામાં આવે છે. આ વિદ્યાર્થીઓને ધમકી આપવામાં આવે છે કે જો તેઓ વિરોધમાં નહીં જોડાય, તો તેમની રહેવા અને જમવાની સુવિધાઓ બંધ કરી દેવામાં આવશે. આમ, પાયાની જરૂરિયાતો છીનવાઈ જવાની બીકે વિદ્યાર્થીઓ મજબૂરીવશ આવા પ્રદર્શનોનો ભાગ બની રહ્યા છે.