ઓડિશા: વીકે પાંડિયનની પત્ની સુજાતા રાઉતની રાજકારણમાં એન્ટ્રી, આગામી ચૂંટણીમાં BJDની કમાન કોણ સંભાળશે? નવીન પટનાયકે કર્યો મોટો ખુલાસો

Odisha Politics: ઓડિશાના રાજકારણમાં એક મોટો અને મહત્વનો વળાંક આવ્યો છે. પૂર્વ મુખ્યમંત્રી નવીન પટનાયકના સૌથી નજીકના સહયોગી મનાતા વીકે પાંડિયનની પત્ની અને પૂર્વ IAS અધિકારી સુજાતા રાઉત કાર્તિકેયન સત્તાવાર રીતે બીજૂ જનતા દળ (BJD)માં જોડાઈ ગયા છે. ગુરુવારે પાર્ટીના મુખ્યાલય ‘શંખ ભવન' ખાતે નવીન પટનાયકની હાજરીમાં તેમણે વિધિવત રીતે પાર્ટીનો ખેસ પહેર્યો હતો.

નવીન પટનાયકની મોટી જાહેરાત: કોણ કરશે નેતૃત્વ?

નવીન પટનાયકે સુજાતા રાઉતનું પાર્ટીમાં સ્વાગત કરતા કહ્યું કે, "સુજાતા એક સામાન્ય કાર્યકર્તા તરીકે BJDમાં જોડાશે. તેઓ એક પૂર્વ IAS અધિકારી રહ્યા છે અને તેમણે ઓડિશાની મહિલાઓની ભલાઈ માટે ઘણા મહત્વના પદો પર શાનદાર કામ કર્યું છે."

આ સાથે જ પટનાયકે એક એવી જાહેરાત કરી જેણે ભવિષ્યમાં પાર્ટીની કમાન કોણ સંભાળશે તેવી તમામ અટકળો પર પૂર્ણવિરામ મૂકી દીધું છે. તેમણે મીડિયા સમક્ષ એકદમ સ્પષ્ટ શબ્દોમાં કહ્યું, "હું ફરી એકવાર બધાને સ્પષ્ટ કરવા માંગુ છું કે આગામી ચૂંટણીઓમાં BJDનું નેતૃત્વ હું પોતે જ કરીશ." આ નિવેદન ઓડિશાના રાજકારણમાં એક મોટો મેસેજ આપે છે કે હાલ પાર્ટીનો કંટ્રોલ નવીન પટનાયકના જ હાથમાં રહેશે.

સુજાતા રાઉતે શું કહ્યું?

પાર્ટીમાં જોડાયા બાદ પત્રકારો સાથે વાત કરતા સુજાતા રાઉતે પોતાની ખુશી વ્યક્ત કરી હતી. તેમણે કહ્યું, "મને 24 વર્ષ સુધી નવીન પટનાયક સાહેબના નેતૃત્વમાં ઓડિશાના લોકોની સેવા કરવાની તક મળી હતી. આજે મને ફરીથી તેમના માર્ગદર્શન હેઠળ રાજ્ય માટે કામ કરવાનું સૌભાગ્ય મળ્યું છે. ભગવાન જગન્નાથ અને લાખો BJD કાર્યકર્તાઓના આશીર્વાદથી હું પૂરી નિષ્ઠા અને લગનથી લોકો માટે કામ કરીશ."