‘વક્ફ સુધારા બિલ પાછું લો, નહીંતર...’ મુસ્લિમ પર્સનલ લો બોર્ડે આપી નવી ધમકી

ઓલ ઈન્ડિયા મુસ્લિમ પર્સનલ લો બોર્ડ (AIMPLB)એ કેન્દ્ર સરકારને વક્ફ સુધારા બિલ પાછું ખેંચવાની માંગ કરી છે અને કહ્યું છે કે જો તેમની માંગણીઓ પૂર્ણ નહીં થાય અને બિલ સંસદ દ્વારા પસાર નહીં થાય, તો દેશવ્યાપી આંદોલન શરૂ કરવામાં આવશે. AIMPLB એ વક્ફ (સુધારા) બિલ વિરુદ્ધ 17 માર્ચે જંતર-મંતર ખાતે ધરણાનું આયોજન કર્યું છે, જેમાં વિવિધ મુસ્લિમ અને સામાજિક સંગઠનોના પ્રતિનિધિઓ તેમજ ઘણા વિપક્ષી સાંસદોને આમંત્રણ આપવામાં આવ્યું છે, એમ બોર્ડના પ્રવક્તા સૈયદ કાસિમ રસૂલ ઇલ્યાસે મંગળવારે જણાવ્યું હતું.

બોર્ડના પ્રવક્તા સૈયદ કાસિમ રસૂલ ઇલ્યાસે પત્રકારોને જણાવ્યું હતું કે તેલુગુ દેશમ પાર્ટી (ટીડીપી) અને જનતા દળ(યુ) જેવા ભાજપના સાથી પક્ષોને વિરોધ પ્રદર્શનમાં આમંત્રણ આપવામાં આવ્યું નથી. તેમણે કહ્યું, "દુર્ભાગ્યપૂર્ણ છે કે ભાજપના સાથી પક્ષો પણ તેના સાંપ્રદાયિક રાજકારણમાં તેનું સમર્થન કરી રહ્યા છે."

5 કરોડ મુસ્લિમોના અભિપ્રાયની અવગણના કરવામાં આવી

તેમના મતે, 5 કરોડ મુસ્લિમોએ ઈ-મેલ દ્વારા સંયુક્ત સંસદીય સમિતિ (JPC) સમક્ષ પોતાનો અભિપ્રાય વ્યક્ત કર્યો, પરંતુ બધું અવગણવામાં આવ્યું. તેમણે પુનરોચ્ચાર કર્યો કે જો આ બિલ પસાર થશે તો દેશવ્યાપી આંદોલન શરૂ કરવામાં આવશે. તેમણે કહ્યું કે આ બિલ મુસ્લિમો પર "સીધો હુમલો" છે. પ્રવક્તાએ જણાવ્યું હતું કે આ બિલ ભેદભાવપૂર્ણ છે કારણ કે તે વકફ બોર્ડ અને પરિષદોમાં બિન-મુસ્લિમ સભ્યોનો સમાવેશ કરવાની જોગવાઈ કરે છે જ્યારે હિન્દુઓ અને શીખોના દાનના સંચાલન માટે આવી કોઈ જોગવાઈ નથી.

એક નિવેદનમાં, AIMPLBના મહાસચિવ મૌલાના ફઝલુર રહીમ મુજદ્દીદી અને ઇલ્યાસે જણાવ્યું હતું કે 5 કરોડ મુસ્લિમો દ્વારા બિલ વિરુદ્ધ સંયુક્ત સમિતિને ઇમેઇલ મોકલવા અને મુસ્લિમ પર્સનલ લો બોર્ડ, મુખ્ય રાષ્ટ્રીય અને રાજ્ય સ્તરના મુસ્લિમ સંગઠનો અને અગ્રણી વ્યક્તિઓ દ્વારા વ્યાપક રજૂઆતો છતાં, સરકારે માત્ર પોતાના વલણ પર પુનર્વિચાર કરવાનો ઇનકાર કર્યો નથી પરંતુ બિલને વધુ "કઠોર અને વિવાદાસ્પદ" પણ બનાવ્યું છે.

અગાઉ વિરોધ પ્રદર્શન 13 માર્ચે થવાનું હતું

આપને જણાવી દઈએ કે પર્સનલ લો બોર્ડ પહેલા 13 માર્ચે વિરોધ પ્રદર્શન કરવાનું હતું, પરંતુ તે દિવસે સંસદની સંભવિત રજાને કારણે, ઘણા સાંસદોએ હાજરી આપવા માટે અસમર્થતા વ્યક્ત કરી, ત્યારબાદ તેણે કાર્યક્રમમાં ફેરફાર કર્યો. ઇલ્યાસે જણાવ્યું હતું કે બોર્ડના પ્રતિનિધિઓએ જાન્યુઆરી અને ફેબ્રુઆરીમાં ટીડીપીના વડા ચંદ્રબાબુ નાયડુ અને જેડી(યુ)ના પ્રમુખ નીતિશ કુમારને મળ્યા હતા અને તેમનો ટેકો માંગ્યો હતો, પરંતુ હાલમાં બંને પક્ષો આ મુદ્દા પર સરકારની સાથે હોય તેવું લાગે છે. એવું માનવામાં આવે છે કે સરકાર આ બિલને વર્તમાન સત્ર (બજેટ સત્રના બીજા તબક્કા) માં સંસદમાં રજૂ કરી શકે છે.