અમદાવાદ નવરાત્રી 2026: ગરબા આયોજકો માટે પોલીસના 44 કડક નિયમો, રાત્રે 12 વાગ્યા સુધી જ વગાડી શકાશે સ્પીકર

Ahmedabad Navratri 2026: અમદાવાદમાં આગામી 11થી 20 ઓક્ટોબર દરમિયાન નવરાત્રી અને દશેરાના પર્વની ભવ્ય ઉજવણી થવા જઈ રહી છે. ખેલૈયાઓ અને આયોજકો અત્યારથી જ ગરબાની તૈયારીઓમાં લાગી ગયા છે. આ ઉત્સવ દરમિયાન શહેરમાં શાંતિ જળવાઈ રહે, ટ્રાફિકની સમસ્યા ન સર્જાય અને મહિલાઓ સુરક્ષિત રીતે ગરબા રમી શકે તે માટે અમદાવાદ પોલીસ કમિશનરે સત્તાવાર જાહેરનામું બહાર પાડ્યું છે.

પોલીસે પાર્ટી પ્લોટ, ક્લબ, સોસાયટીઓ અને શેરી ગરબાના આયોજકો માટે કુલ 44 નિયમો બનાવ્યા છે. જેમાં પરવાનગી માટે 12 અને વ્યવસ્થા જાળવવા માટે 32 નિયમોનો સમાવેશ કરવામાં આવ્યો છે. ચાલો જાણીએ આ વર્ષે ગરબાના આયોજન માટે કયા કયા નિયમોનું પાલન કરવું પડશે.

માઈક અને લાઉડ સ્પીકર માટે સમય મર્યાદા

પોલીસના નવા નિયમ મુજબ, કોઈપણ ગરબા આયોજનમાં રાત્રે 12 વાગ્યા સુધી જ માઈક, લાઉડ સ્પીકર કે સાઉન્ડ સિસ્ટમનો ઉપયોગ કરી શકાશે. 12 વાગ્યા પછી ફરજિયાતપણે સિસ્ટમ બંધ કરવી પડશે. આ ઉપરાંત હોસ્પિટલ, શૈક્ષણિક સંસ્થાઓ અને કોર્ટની આસપાસ આવતા સાયલન્ટ ઝોનમાં લાઉડ સ્પીકર વગાડવા પર પ્રતિબંધ રહેશે. સાઉન્ડ સિસ્ટમ ભાડે આપનારની તમામ વિગતો આયોજકોએ પોલીસને આપવાની રહેશે અને જો સાઉન્ડને લગતી કોઈ ઘટના બનશે તો આયોજક અને સિસ્ટમના માલિક બંને જવાબદાર ગણાશે.

પરવાનગી કોની પાસેથી લેવાની રહેશે?

શેરી ગરબા: સોસાયટીઓ અને શેરી ગરબા જે બિનવ્યાવસાયિક છે, તેના માટે લાઉડ સ્પીકરની મંજૂરી સ્થાનિક પોલીસ સ્ટેશનના પી.આઈ. (PI) દ્વારા સરળતાથી આપવામાં આવશે. પોલીસ અને પબ્લિક વચ્ચે સંકલન રહે તે માટે આયોજકોએ બે મેન્ટર અને પોલીસે એક મેન્ટરની નિમણૂક કરવાની રહેશે.

પાર્ટી પ્લોટ અને ક્લબ: ટિકિટ કે પાસવાળા કોમર્શિયલ આયોજનો માટે પોલીસ સ્ટેશનનો અભિપ્રાય લીધા બાદ એસીપી ટ્રાફિક (ACP Traffic) દ્વારા મંજૂરી આપવામાં આવશે.