બાલી પ્રવાસીઓની હરકતોથી થયું પરેશાન, ખાસ સ્થળોએ મુસાફરી પર મુક્યો પ્રતિબંધ

બાલીના ગવર્નરે તાજેતરમાં તેના 22 પર્વત શિખરો પર પ્રવાસીઓ પર પ્રતિબંધ મૂક્યો છે. આ નિર્ણય તાત્કાલિક અસરથી જાહેર કરવા જણાવાયું છે. વાસ્તવમાં બહારથી આવતા લોકોની ખરાબ આદતોથી પરેશાન બાલી સરકારે આ નિર્ણય લીધો છે. બાલી એક ખૂબ જ પોપ્યુલર પર્યટન સ્થળ છે. કોરોના મહામારીના એક વર્ષ પહેલા લગભગ 6.2 મિલિયન લોકોએ બાલીની મુલાકાત લીધી હતી. અહીંની અર્થવ્યવસ્થાનો 60 ટકા હિસ્સો પ્રવાસનમાંથી આવે છે.

જો તમે બાલીની મુલાકાત લેવા જઈ રહ્યા છો, તો જણાવો કે ત્યાં કરવામાં આવતી પર્વત સંબંધિત પ્રવૃત્તિઓ પર પ્રતિબંધ મૂકવામાં આવ્યો છે. પ્રવાસીઓ હવે બાલીના 22 પર્વત શિખરો પર હાઇકિંગ અને ક્લાઇમ્બીંગ માટે જઈ શકશે નહીં. બાલીના પોપ્યુલર પર્વત શિખરો બતુર અને અગુંગ જોવા જતા પ્રવાસીઓ માટે આ ખરાબ સમાચાર છે.

બાલીના ગવર્નર વાયન કોસ્ટરે જણાવ્યું કે આ તમામ પર્વતો ખૂબ જ પવિત્ર છે. લોકો દ્વારા તેમની પવિત્રતા સતત બગાડવામાં આવી રહી છે. જેની બાલીના લોકોની ભાવનાઓને ઠેસ પહોંચી રહી છે. બાલીના ગવર્નરે માત્ર બહારથી આવતા પ્રવાસીઓ જ નહીં પરંતુ દેશના અન્ય ભાગોમાંથી આવતા પ્રવાસીઓ પર પણ પ્રતિબંધ મૂક્યો છે. આ પ્રતિબંધ તાજેતરમાં લાદવામાં આવ્યો હતો જ્યારે બહારના લોકોના જૂથને ઇન્ડોનેશિયાથી દેશનિકાલ કરવામાં આવ્યો હતો અને અધિકારીઓ દ્વારા તેમના પર 6 મહિનાના લાંબા ગાળા માટે પ્રતિબંધ મૂકવામાં આવ્યો હતો.

બાલીના ગવર્નરે જણાવ્યું કે આ પ્રતિબંધ કાયમ માટે છે. આ વિદેશી નાગરિકો અને સ્થાનિક રહેવાસીઓને પણ લાગુ પડે છે. આ પર્વત શિખરો સાથે સંકળાયેલા વિશેષ ધાર્મિક સમારોહ દરમિયાન માત્ર સ્થાનિક રહેવાસીઓને જ આ છૂટ આપવામાં આવશે.