માતા-પિતાની અવગણના કરશો તો ખિસ્સું થશે ખાલી! આ રાજ્યની સરકાર લાવી રહી છે નવો કાયદો

તેલંગાણા સરકારે સરકારી કર્મચારીઓ માટે એક નવો અને કડક કાયદો લાવવાની જાહેરાત કરી છે, જેમાં જો કોઈ કર્મચારી પોતાના બુજુર્ગ માતા-પિતાની જવાબદારીથી મુંહ ફેરવશે, તો તેના પગારમાંથી 10થી 15 ટકા રકમ કાપીને સીધી તેમના માતા-પિતાના બેંક ખાતામાં જમા કરવામાં આવશે. આ ઘોષણા મુખ્યમંત્રી એ. રેવંત રેડ્ડીએ શનિવારે નવનિયુક્ત ગ્રુપ-II કર્મચારીઓને નિમણૂક પત્રો આપતી વખતે કરી હતી.

મુખ્યમંત્રીએ કહ્યું કે, “અમે એક એવો કાયદો લાવવા જઈ રહ્યા છીએ, જેમાં જો કોઈ સરકારી કર્મચારી પોતાના માતા-પિતાની અવગણના કરશે, તો તેના પગારમાંથી 10 થી 15 ટકા રકમ કાપીને તેમના માતા-પિતાના ખાતામાં ટ્રાન્સફર કરવામાં આવશે. જેમ તમને દર મહિને પગાર મળે છે, તેમ તમારા માતા-પિતાને પણ તેનો એક હિસ્સો નિયમિત મળે તેની ખાતરી કરીશું.” આ કાયદાનો ડ્રાફ્ટ તૈયાર કરવા માટે મુખ્ય સચિવ રામકૃષ્ણ રાવને એક વિશેષ સમિતિ બનાવવાનો નિર્દેશ આપવામાં આવ્યો છે.

આ નવા કાયદાનો હેતુ સમાજમાં પારિવારિક જવાબદારી અને માનવીય સંવેદનાઓને પ્રોત્સાહન આપવાનો છે. મુખ્યમંત્રી રેવંત રેડ્ડીએ જણાવ્યું કે આજના સમયમાં ઘણા બુજુર્ગ માતા-પિતા પોતાના જ સંતાનો દ્વારા અવગણવામાં આવે છે, ખાસ કરીને જ્યારે સંતાનો નોકરીએ હોય અને માતા-પિતાની આર્થિક કે ભાવનાત્મક જરૂરિયાતોની અવગણના કરે. આવા માતા-પિતાને ન્યાય અપાવવા માટે સરકાર પ્રતિબદ્ધ છે.

આ કાયદો જો અમલમાં આવશે, તો તે માત્ર સામાજિક સુધારો જ નહીં, પરંતુ અન્ય રાજ્યો માટે પણ એક ઉદાહરણ બની શકે છે. આ નિર્ણયથી સરકારી કર્મચારીઓમાં પોતાના બુજુર્ગ માતા-પિતા પ્રત્યે જવાબદારીની ભાવના જાગૃત થશે અને પારિવારિક સંબંધોને મજબૂતી મળશે.

આ પણ વાંચો-Japan UPI payment: હવે જાપાનમાં પણ UPIથી પેમેન્ટ, ભારતીય પ્રવાસીઓ માટે સરળ અને સુરક્ષિત ઓપ્શન