Top Trading Picks : નિફ્ટી 23750-23800 નીચે રહે ત્યાં સુધી વેચવાલીની જ સલાહ, આજે આ 2 શેરોમાં થઈ શકે છે બમ્પર કમાણી

Top Trading Picks : શેરબજારમાં રોકાણકારો અને ટ્રેડર્સ માટે આજના દિવસના ટોપ ટ્રેડિંગ પિક્સ અને રણનીતિ સામે આવી છે. માર્કેટનું એકંદરે માળખું જોતાં હાલમાં બજારમાં ‘ઉછાળે વેચવાલી' (Sell on Rise) નું જ વલણ જોવા મળી રહ્યું છે. નિફ્ટી જ્યાં સુધી 23750-23800 ની રેન્જની નીચે ટ્રેડ કરી રહ્યો છે, ત્યાં સુધી એક્સપર્ટ્સ વેચવાલીની જ સલાહ આપી રહ્યા છે. આગામી સમયમાં નીચલા સ્તરે 23100 સુધીના ટાર્ગેટ જોવા મળી શકે છે.

બજારની વર્તમાન સ્થિતિ અને સેક્ટર અપડેટ

ભારતીય શેરબજાર તેના ઉપલા સ્તરેથી થોડું હળવું થયું છે. હાલમાં નિફ્ટી લગભગ 80 પોઈન્ટના વધારા સાથે 23500 ની આસપાસ ટ્રેડ થતો જોવા મળી રહ્યો છે. બેન્ક નિફ્ટીમાં પણ સામાન્ય વધારો નોંધાયો છે. જોકે, મિડકેપ અને સ્મોલકેપ શેરોમાં ઉપલા મથાળેથી ઘટાડો આવ્યો છે.

બજારની ચંચળતા દર્શાવતા ઈન્ડિયા વિક્સ (INDIA VIX) માં 3 ટકાનો ઘટાડો નોંધાયો છે, જે બજાર માટે થોડી રાહતના સમાચાર છે. આજે ફાર્મા અને કેમિકલ શેરોમાં સારી ખરીદી જોવા મળી રહી છે અને બંને સેક્ટરના ઈન્ડેક્સ 1 ટકા જેટલા વધ્યા છે. કેપિટલ માર્કેટ અને સરકારી બેંકોમાં પણ રોનક છે, પરંતુ IT શેરોમાં સળંગ ત્રીજા દિવસે પણ ઘટાડો ચાલુ છે. વાયદા બજારમાં પર્સિસ્ટન્ટ અને કોફોર્જ 3 ટકાથી વધુ ઘટીને ટોપ લુઝર્સની યાદીમાં સામેલ થયા છે.

નિફ્ટીનો ટ્રેન્ડ: એક્સપર્ટની સલાહ

ઇક્વિનોક્સ રિસર્ચ એન્ડ એડવાઇઝર્સ (EQUINOX Research & Advisors) ના પંકજ રાંદડે આજની રણનીતિ વિશે વાત કરતા જણાવ્યું કે, ગઈકાલનું સેશન ઘણું સુસ્ત રહ્યું હતું. IT, ઓટો અને રિયલ્ટી સેક્ટર ગઈકાલે બજાર માટે વિલન સાબિત થયા હતા. જોકે, મેટલ, PSE, ડિફેન્સ અને ઇન્ફ્રાસ્ટ્રક્ચરમાં થોડી મજબૂતી હતી.

ઓવરઓલ માર્કેટનું સ્ટ્રક્ચર ઉછાળે વેચવાલી કરવા માટેનું જ છે. જ્યાં સુધી નિફ્ટી 23750-23800 ની નીચે છે, ત્યાં સુધી શોર્ટ પોઝિશન (વેચવાલી) બનાવી શકાય. ડાઉનસાઇડમાં 23100 નો ટાર્ગેટ મળી શકે છે. ચાર્ટ પર RSI પણ નેગેટિવ ડાયવર્ઝન સાથે ડાઉન ટ્રેન્ડ જ બતાવી રહ્યો છે.