મજૂરના દીકરાની કમાલ, ભારતીય સેના માટે બનાવશે અત્યાધુનિક ડ્રોન, સંરક્ષણ મંત્રાલયે મંજૂર કર્યા 3.50 કરોડ રૂપિયા

જો વ્યક્તિમાં કંઈક કરી છૂટવાની ધગશ હોય, તો ગરીબી કે સાધનોનો અભાવ ક્યારેય નડતો નથી. હમીરપુરની સરકારી પોલીટેકનિક કોલેજના એક છાત્રે આ વાત સાબિત કરી બતાવી છે. એક સામાન્ય અને ગરીબ પરિવારમાંથી આવતા સર્વેશ શર્માએ ભારતીય સેનાની સુરક્ષા અને જરૂરિયાતોને ધ્યાનમાં રાખીને એક એવું અત્યાધુનિક ડ્રોન તૈયાર કર્યું છે, જેની નોંધ છેક દિલ્હી સુધી લેવાઈ છે. આ પ્રોજેક્ટની સફળતાને જોતા રક્ષા મંત્રાલય દ્વારા તેને આગળ વધારવા માટે 3.50 કરોડ રૂપિયાની માતબર ગ્રાન્ટ ફાળવવામાં આવી છે.

આ રીતે આવ્યો ડ્રોન બનાવવાનો આઈડિયા

સર્વેશ શર્મા હમીરપુરની સરકારી પોલીટેકનિક કોલેજમાં કમ્પ્યુટર એન્જિનિયરિંગના 5 માં સેમેસ્ટરનો વિદ્યાર્થી છે. તાજેતરમાં તેણે IIT જોધપુર અને કોણાર્ક કોર દ્વારા આયોજિત નેશનલ લેવલની ઓપન કાર્ડબોર્ડ ડ્રોન સ્પર્ધામાં ભાગ લીધો હતો. આ સ્પર્ધામાં દેશભરમાંથી આવેલી લગભગ 50 જેટલી ટીમોએ પોતાના આઈડિયા રજૂ કર્યા હતા. આ કઠિન સ્પર્ધામાં સર્વેશની ટીમે ઉત્કૃષ્ટ પ્રદર્શન કરીને ચોથું સ્થાન પ્રાપ્ત કર્યું હતું. બસ, અહીંથી જ તેને દેશની સેના માટે કંઈક મોટું કરવાની પ્રેરણા મળી.

શરૂઆતી મોડેલ અને ગ્રાન્ટની સફર

સ્પર્ધામાંથી પ્રેરણા લઈને સર્વેશે પોતાના ડ્રોન પ્રોજેક્ટ પર ગંભીરતાથી કામ શરૂ કર્યું. સૌથી પહેલા તેણે આ ડ્રોનનું પ્રોટોટાઈપ (પ્રાથમિક મોડેલ) તૈયાર કર્યું, જેમાં તેને આશરે 87,000 રૂપિયાનો ખર્ચ થયો.ત્યારબાદ તેણે પોતાના આ આઈડિયાને ડિફેન્સ ઈનોવેશન ઓર્ગેનાઈઝેશન અને ઈનોવેશન ફોર ડિફેન્સ એક્સેલન્સ હેઠળ સ્ટાર્ટઅપ તરીકે રજૂ કર્યો.તેના આ પ્રોજેક્ટમાં રહેલી સંભાવનાઓને જોતા, સંરક્ષણ મંત્રાલયે તેને આગળ વધારવા માટે 3.50 કરોડ રૂપિયાની ગ્રાન્ટ મંજૂર કરી છે.

શું છે આ ડ્રોનની ખાસિયતો?

સર્વેશ હવે જે પ્રોજેક્ટ પર કામ કરવાનો છે તેનું નામ 'રુદ્રા એજ T-1 (સ્પેક્ટ્રા)' રાખવામાં આવ્યું છે. આ ડ્રોન ખાસ કરીને ભારતીય સેના માટે બોર્ડર પર નજર રાખવા (સીમા નિગરાની) માટે વિકસાવવામાં આવી રહ્યું છે. તેની સૌથી મોટી ખાસિયત એ હશે કે તે દુશ્મન દેશના રડારની પકડમાં નહીં આવે. આ ઉપરાંત, દુશ્મનો દ્વારા કરવામાં આવતા ઈલેક્ટ્રોનિક જામિંગની અસરને પણ આ ડ્રોન સરળતાથી નિષ્ફળ બનાવી શકશે.