મેટાનું ધમાકેદાર AI સ્પીચ મોડેલ લોન્ચ: હવે 1600+ ભાષાઓ સમજાશે, ભારતીયો માટે મોટી રાહત!

Meta AI Omnilingual ASR: માર્ક ઝુકરબર્ગની કંપની મેટાએ આર્ટિફિશિયલ ઇન્ટેલિજન્સ (AI)ના ક્ષેત્રમાં એક બહુ મોટું અને ક્રાંતિકારી પગલું ભર્યું છે. કંપનીએ ઓમ્નિલિંગ્યુઅલ ઓટોમેટિક સ્પીચ રિકગ્નિશન (Omnilingual ASR) નામનું એક નવું AI સ્પીચ મોડેલ લોન્ચ કર્યું છે. મેટાનો દાવો છે કે આ દુનિયાનું પહેલું એવું AI મોડેલ છે જે 1600થી વધુ ભાષાઓ અને બોલીઓને સમજી શકે છે અને ઓળખી શકે છે. આનાથી એવા કરોડો લોકો માટે AI ટેક્નોલોજીનો ઉપયોગ શક્ય બનશે જેઓ માત્ર પોતાની સ્થાનિક, પ્રાદેશિક અથવા દુર્લભ ભાષાઓ બોલે છે અને અંગ્રેજી કે અન્ય મોટી ભાષાઓ જાણતા નથી.

ભારતીયો માટે કેમ છે આ ખુશખબરી?

ભારત વિવિધ ભાષાઓ અને બોલીઓનો દેશ છે. આ મોડેલનું સૌથી મોટું આકર્ષણ એ છે કે તે હિન્દી, બંગાળી, તમિલ જેવી પ્રચલિત ભાષાઓની સાથે સાથે છત્તીસગઢી અને અવધી જેવી ઘણી દુર્લભ ભારતીય બોલીઓ અને ઉચ્ચારણોને પણ ઓળખી શકે છે. ખાસ કરીને, આ મોડેલમાં 500થી વધુ એવી ભાષાઓનો સમાવેશ કરવામાં આવ્યો છે જેના બહુ ઓછા ડિજિટલ રેકોર્ડ્સ કે ડેટા ઉપલબ્ધ છે. આનાથી એવા લોકો કે જેઓ માત્ર લોકલ લેંગ્વેજની મદદથી પોતાનું કામકાજ કરે છે, તેમના સુધી મેટાનો AI મોડેલ સરળતાથી પહોંચ બનાવી શકશે. એટલે કે, હવે તમે તમારી માતૃભાષામાં AIને સવાલ કરી શકશો અને જવાબ મેળવી શકશો.

ઓમ્નિલિંગ્યુઅલ ASRની મુખ્ય વિશેષતાઓ:

વિશ્વસનીયતા: આ મોડેલ 1600થી વધુ ભાષાઓની ઓળખ કરીને તેમને સમજી શકે છે.

ભાષાઈ સમાવેશકતા: આ મોડેલ "સમાવેશી AI" (Inclusive AI) ના સિદ્ધાંત પર કામ કરે છે, જેનો ઉદ્દેશ AI ટેકનોલોજીને વિશ્વના વ્યાપક યુઝર બેઝ સુધી પહોંચાડવાનો છે.

દુર્લભ ભાષાઓ પર ફોકસ: તે પ્રાચીન અને ઓછી બોલાતી બોલીઓ માટે પણ સંપૂર્ણ રીતે સક્ષમ છે.