Olympic 2036: શું અમદાવાદ બનશે આગામી ગ્લોબલ રમતોનું કેન્દ્ર?

Olympic 2036:  ભારતે ઓલિમ્પિક 2036ની યજમાની માટે પોતાનું નામ આગળ કર્યું છે, જેમાં અમદાવાદને મુખ્ય શહેર તરીકે પસંદ કરવામાં આવ્યું છે. ઇન્ડિયન ઓલિમ્પિક એસોસિએશન (IOA)ના ઉચ્ચ સ્તરીય પ્રતિનિધિમંડળે 1 જુલાઈ, 2025ના રોજ સ્વિટ્ઝરલેન્ડના લુસાને ખાતે આંતરરાષ્ટ્રીય ઓલિમ્પિક કમિટીના હેડક્વાર્ટરની મુલાકાત લીધી હતી. આ પ્રતિનિધિમંડળનું નેતૃત્વ IOAના પ્રમુખ અને દિગ્ગજ એથ્લીટ પીટી ઉષાએ કર્યું હતું.

અમદાવાદ શા માટે?

ભારતીય પ્રતિનિધિમંડળે IOC અધિકારીઓ સાથેની બેઠકમાં અમદાવાદમાં ઓલિમ્પિક 2036નું આયોજન કરવાની ઇચ્છા વ્યક્ત કરી. આ બેઠકમાં કેન્દ્રીય રમતગમત મંત્રાલયના વરિષ્ઠ અધિકારીઓ પણ સામેલ હતા. IOCએ ભારતને સમર ગેમ્સની યજમાની માટે જરૂરી પગલાં અને પ્રક્રિયાઓ વિશે વિગતવાર માહિતી આપી. IOAએ એક પ્રેસ રિલીઝમાં જણાવ્યું કે, “આ બેઠક ખૂબ જ મહત્વપૂર્ણ હતી, જેમાં અમદાવાદમાં ઓલિમ્પિકનું આયોજન કરવાની શક્યતાઓ પર ચર્ચા થઈ.”

ઓલિમ્પિક 2036ની રેસમાં ભારત સાથે કયા દેશ?

2028નું ઓલિમ્પિક લોસ એન્જેલસમાં અને 2032નું ઓલિમ્પિક બ્રિસ્બેનમાં યોજાશે. આથી, ભારતની નજર હવે 2036ના ઓલિમ્પિક પર છે. ભારત ઉપરાંત સાઉદી અરેબિયા, ઇન્ડોનેશિયા, તુર્કી અને ચિલી જેવા દેશો પણ ઓલિમ્પિક અને પેરાલિમ્પિક 2036ની યજમાની માટે રેસમાં છે. IOCએ તાજેતરમાં યજમાન દેશની પસંદગી પ્રક્રિયામાં કેટલાક ફેરફારો કર્યા છે, જેના કારણે આ રેસ હવે વધુ રસપ્રદ બની છે.

પીટી ઉષાનું નિવેદન

IOC સાથેની બેઠક બાદ પીટી ઉષાએ કહ્યું, “ભારતીય ધરતી પર ઓલિમ્પિકનું આયોજન માત્ર એક યાદગાર ઘટના જ નહીં હોય, પરંતુ તે આવનારી પેઢીઓ પર પણ ઊંડી અસર કરશે.” ઉલ્લેખનીય છે કે, ભારતે અગાઉ ઓક્ટોબર 2023માં IOCને પત્ર લખીને ઓલિમ્પિક 2036ની યજમાની માટે રસ દાખવ્યો હતો.