Vegetarians Only Row: ‘અહીં માત્ર શાકાહારી વિદ્યાર્થીઓને જ બેસવાની છૂટ છે', IIT બોમ્બેની હોસ્ટેલ કેન્ટીનમાં પોસ્ટર પર વિવાદ

Vegetarians Only Row: ઇન્ડિયન ઇન્સ્ટિટ્યૂટ ઑફ ટેક્નોલોજી (IIT) બોમ્બેના વિદ્યાર્થીઓએ હોસ્ટેલની કેન્ટીનની દિવાલ પર 'ફક્ત શાકાહારી' પોસ્ટર ચોંટાડ્યા પછી ભોજનમાં ભેદભાવનો આક્ષેપ કર્યો છે. ગયા અઠવાડિયે, પ્રતિષ્ઠિત સંસ્થાની હોસ્ટેલ-12ની કેન્ટીનમાં એક પોસ્ટર ચોંટાડવામાં આવ્યું હતું, જેમાં લખ્યું હતું કે 'અહીં ફક્ત શાકાહારીઓને જ બેસવાની છૂટ છે'. આ અંગેની એક તસવીર પણ સોશિયલ મીડિયા પર સામે આવી છે. સંસ્થાના એક અધિકારીએ દાવો કર્યો હતો કે તેમને આ પ્રકારનું એક પોસ્ટર મળ્યું છે, પરંતુ તેને કેન્ટીનની બહાર કોણે લગાવ્યું છે તે ખબર નથી.

અધિકારીએ સમાચાર એજન્સી પીટીઆઈને જણાવ્યું કે વિવિધ પ્રકારનું ભોજન ધરાવતા લોકો માટે કોઈ નિશ્ચિત બેઠકો નથી. આ પોસ્ટરો કોણે લગાવ્યા છે તેની સંસ્થાને જાણ નથી. વિદ્યાર્થી જૂથ આંબેડકર પેરિયાર ફુલે સ્ટડી સર્કલ (APPSC) ના પ્રતિનિધિઓએ આ ઘટનાની નિંદા કરી અને પોસ્ટરો ફાડી નાખ્યા.

APPSCએ માહિતી આપી, “તે છાત્રાલયના જનરલ સેક્રેટરીને લખેલા RTI અને ઈ-મેલ દ્વારા પ્રકાશમાં આવ્યું છે કે સંસ્થામાં અલગ ભોજન માટે કોઈ પોલીસી નથી. કેટલાક વિદ્યાર્થીઓએ કેન્ટીનના અમુક વિભાગોને 'ફક્ત શાકાહારી' તરીકે ચિહ્નિત કર્યા છે. પરિણામે, અન્ય વિદ્યાર્થીઓને છોડી દેવાની ફરજ પડી હતી."

આ ઘટના બાદ હોસ્ટેલના જનરલ સેક્રેટરીએ તમામ વિદ્યાર્થીઓને ઈ-મેઈલ મોકલીને જણાવ્યું છે કે, હોસ્ટેલની કેન્ટીનમાં જૈન ડિસ્ટ્રીબ્યુશન કાઉન્ટર છે પરંતુ જૈન ફૂડ ધરાવતા લોકો માટે આવી કોઈ જગ્યા નથી.