લિથુઆનિયાના GEN Z યુવાનો શા માટે ખુશ? વિશ્વભરમાં નાખુશ જનરેશન વચ્ચે નાનકડા દેશનું રહસ્ય!

વૈશ્વિક સ્તરે GEN Z (13 થી 28 વર્ષની ઉંમર) નિરાશા અને અસંતોષનો સામનો કરી રહી છે. નેપાળમાં આ અસંતોષે બળવાનું સ્વરૂપ લીધું, જેનાથી સરકારનું પતન થયું. અમેરિકા જેવા દેશોમાં પણ યુવાનો એકલતા અને સ્પર્ધાના ડરથી પીડાય છે. પરંતુ આવા સમયમાં યુરોપના નાનકડા દેશ લિથુઆનિયાના યુવાનો ‘વર્લ્ડ હેપ્પીનેસ ઈન્ડેક્સ’માં ટોચ પર છે. 30 વર્ષથી ઓછી ઉંમરના યુવાનોએ પોતાની ખુશીને 10માંથી 8 ગુણ આપ્યા. આ ખુશી પાછળનું રહસ્ય શું?

સ્વતંત્રતાથી સફળતા સુધી

1990માં સોવિયેત યુનિયનથી આઝાદી મેળવનાર લિથુઆનિયાએ યુવા-કેન્દ્રિત નીતિઓથી પ્રગતિ કરી. શરૂઆતમાં અસ્થિર અર્થતંત્ર અને નીચું જીવન સ્તર હોવા છતાં, દેશે યુવાનોના કૌશલ્ય અને જરૂરિયાતોને પ્રાધાન્ય આપ્યું.

સ્ટ્રેસ-ફ્રી શિક્ષણ

લિથુઆનિયામાં સરકારી શિક્ષણ ફ્રી છે, અને ખાનગી સંસ્થાઓની ફી પણ ઓછી છે. વિદ્યાર્થીઓને અભ્યાસ સાથે પાર્ટ-ટાઇમ જોબની સુવિધા મળે છે, જેથી લોનનો બોજ નથી. ગામડામાંથી આવતા વિદ્યાર્થીઓ માટે સસ્તું રહેઠાણ અને ‘સબલેટ’નો વિકલ્પ ખર્ચ ઘટાડે છે. આ બધું વિદ્યાર્થીઓનો તણાવ ઓછો કરે છે.

જીવંત નાઇટલાઇફ અને સંસ્કૃતિ

રાજધાની વિલ્નિયસનો યુનેસ્કો હેરિટેજ વિસ્તાર, રેસ્ટોરન્ટ્સ, થિયેટર અને લાઇવ કોન્સર્ટ યુવાનોને આકર્ષે છે. આ રંગીન માહોલ GEN Zને જીવનમાં ઉત્સાહ જાળવી રાખે છે.