Arun Gandhi: મહાત્મા ગાંધીના પૌત્ર અરુણ ગાંધીનું નિધન, ઘણા સમયથી હતા બીમાર

Arun Gandhi: મહાત્મા ગાંધીના પૌત્ર અરુણ ગાંધીનું મંગળવારે મહારાષ્ટ્રના કોલ્હાપુરમાં નિધન થયું હતું. તેઓ 89 વર્ષના હતા. પારિવારિક સૂત્રોએ જણાવ્યું કે તેઓ છેલ્લા કેટલાક સમયથી બિમાર હતા. અરુણ ગાંધીના પુત્ર તુષાર ગાંધીએ સમાચાર એજન્સી પીટીઆઈને જણાવ્યું કે લેખક અને સામાજિક-રાજકીય કાર્યકર અરુણ ગાંધીના અંતિમ સંસ્કાર મંગળવારે કોલ્હાપુરમાં કરવામાં આવશે. અરુણ ગાંધીના પુત્ર તુષાર ગાંધીએ પણ મંગળવારે ટ્વીટ કરીને આ વાતની પુષ્ટિ કરી હતી.

એક નિવેદનમાં કહેવામાં આવ્યું છે કે અરુણ ગાંધી છેલ્લા ઘણા દિવસોથી બીમાર હતા. તુષાર ગાંધીએ જણાવ્યું કે તેમના પિતાના અંતિમ સંસ્કાર આજે જ કોલ્હાપુરમાં કરવામાં આવશે. અરુણ ગાંધીનો જન્મ 14 એપ્રિલ 1934ના રોજ ડરબનમાં થયો હતો.

તેઓ મણિલાલ ગાંધી અને સુશીલા મશરૂવાલાના પુત્ર હતા. અરુણ ગાંધી મહાત્મા ગાંધીના બીજા પુત્ર મણિલાલ ગાંધીના પુત્ર હતા. અરુણ ગાંધી તેમના દાદાના પગલે ચાલ્યા અને સામાજિક કાર્યકર બન્યા.

તેઓ લાંબા સમયથી સામાજિક અને રાજકીય મુદ્દાઓ પર કાર્યકર્તા તરીકે કામ કરતા હતા. તેમણે પુસ્તકો પણ લખ્યા, જેમાંથી 'ધ ગિફ્ટ ઑફ એન્ગરઃ એન્ડ અધર લેસન્સ ફ્રોમ માય ગ્રાન્ડફાધર મહાત્મા ગાંધી' પ્રખ્યાત છે.