આ વર્ષે સૌથી વધુ પ્રવાસીઓ બાંગ્લાદેશથી આવ્યા ભારતમાં, બીજા નંબરે અમેરિકી અને ત્રીજા આ દેશના નાગરિકો

આ વર્ષે જાન્યુઆરી-જૂન દરમિયાન લગભગ 47.8 લાખ વિદેશી પ્રવાસીઓ દેશમાં આવ્યા હતા. પર્યટન મંત્રાલયના આંકડા મુજબ સૌથી વધુ પ્રવાસીઓ બાંગ્લાદેશ અને અમેરિકાથી આવ્યા હતા. વિશ્વ પ્રવાસન દિવસ નિમિત્તે જાહેર કરાયેલા ઓફિશિયલ આંકડામાંથી આ માહિતી મળી છે. જો કે, દેશની મુલાકાત લેતા પ્રવાસીઓની સંખ્યા હજુ પણ કોવિડ પહેલાના રોગચાળાના લેવલથી પાછળ છે. આ વર્ષે જૂનમાં 7,06,045 વિદેશી પ્રવાસીઓ આવ્યા હતા, જ્યારે જૂન 2023માં 6,48,008 વિદેશી પર્યટકો આવ્યા હતા અને જૂન 2019માં 7,26,446 વિદેશી પ્રવાસીઓ આવ્યા હતા. આ સંખ્યા 2023 કરતાં નવ ટકા વધુ અને 2019 કરતાં 9.8 ટકા ઓછી છે.

આ આંકડો કોવિડ પહેલા કરતા ઓછો

મંત્રાલયે જણાવ્યું હતું કે, “આ વર્ષના પ્રથમ અર્ધવાર્ષિક (જાન્યુઆરી-જૂન) દરમિયાન 47,78,374 વિદેશી પર્યટકો આવ્યા હતા, જે ગયા વર્ષના સમાન સમયગાળામાં 43,80,239 અને કોવિડ રોગચાળા પહેલા 2019 માં સમાન સમયગાળામાં 52,96,025 હતા. આ વર્ષનો આંકડો 2023ની સરખામણીએ 9.1 ટકા વધુ અને 2019ની સરખામણીએ 9.8 ટકા ઓછો છે.

મોટાભાગના પ્રવાસીઓ બાંગ્લાદેશથી આવ્યા

ડેટા અનુસાર, 2024ના પ્રથમ છ મહિનામાં સૌથી વધુ વિદેશી પ્રવાસીઓ બાંગ્લાદેશથી 21.55 ટકા આવ્યા હતા. આ પછી 17.56 ટકા પર્યટકો અમેરિકાથી, 9.82 ટકા બ્રિટનથી, 4.5 ટકા કેનેડાથી અને 4.32 ટકા ઓસ્ટ્રેલિયાથી આવ્યા હતા.

આ પણ વાંચો - પેન્શનના નામે વરિષ્ઠ નાગરિકો સાથે થઈ રહી છે છેતરપિંડી, સરકારે જાહેર કર્યું એલર્ટ