આવા પાન કાર્ડ ધરાવતી વ્યક્તિએ ભરવો પડી શકે છે 10,000 રૂપિયાનો દંડ, ચેક કરી લો ડિટેલ

સરકારે તાજેતરમાં આવકવેરા વિભાગની PAN 2.0 યોજનાને મંજૂરી આપી છે, જેનો ઉદ્દેશ્ય PAN અને TAN જાહેર કરવા અને સંચાલનને સુવ્યવસ્થિત અને આધુનિક બનાવવાનો છે. પાન 2.0માં ડુપ્લિકેટ પાન કાર્ડ નાબૂદ કરવા અને છેતરપિંડી અટકાવવાનો પણ સમાવેશ થાય છે. તમને જણાવી દઈએ કે તાજેતરના સમયમાં PAN દ્વારા છેતરપિંડીની ઘટનાઓ ઝડપથી વધી છે. સરકારની તૈયારી PAN 2.0 દ્વારા તમામ લૂપ હોલ્સને દૂર કરવાની છે. દરમિયાન, સમાચાર આવી રહ્યા છે કે ડુપ્લિકેટ પાન કાર્ડ ધરાવતા લોકોની હવે ખેર નહીં. ડુપ્લિકેટ પાન કાર્ડ શું છે અને જો કોઈની પાસે છે તો તેણે શા માટે 10000નો દંડ ભરવો પડશે.

1 થી વધુ પાન કાર્ડ હોવું ગુનો

આવકવેરા અધિનિયમ 1961ની જોગવાઈઓ મુજબ, કોઈ પણ વ્યક્તિ 1 થી વધુ PAN રાખી શકતો નથી. જો કોઈ વ્યક્તિ પાસે એક કરતાં વધુ PAN હોય, તો તેણે તેને ન્યાયિક મૂલ્યાંકન અધિકારીના ધ્યાન પર લાવવું પડશે અને વધારાના PANને નિષ્ક્રિય કરાવવું પડશે. જો વ્યક્તિ આવું ન કરે અને વિભાગના ધ્યાન પર આવે તો તેણે દંડ ભરવો પડશે. નાણા મંત્રાલયે એક રિલીઝમાં કહ્યું છે કે PAN 2.0 દ્વારા ડુપ્લિકેટ PAN ઓળખવા માટે વધુ સારી ટેક્નોલોજીનો ઉપયોગ કરવામાં આવશે. આનાથી વ્યક્તિ પાસે એકથી વધુ PAN હોવાની ઘટનાઓમાં ઘટાડો થશે. તેનો અર્થ એ છે કે સરકારનું ધ્યાન ડુપ્લિકેટ પાનને સંપૂર્ણપણે નાબૂદ કરવા પર છે.

જો ડુપ્લિકેટ પાન કાર્ડ સરેન્ડર ન થાય તો શું થશે?

જો તમારી પાસે ડુપ્લિકેટ PAN છે અને તમે તેને સરન્ડર ન કરો તો, આવકવેરા વિભાગ આવકવેરા કાયદાની કલમ 272B હેઠળ 10,000 રૂપિયા સુધીનો દંડ લાદી શકે છે. દંડ ભરવાથી પોતાને બચાવવા માટે, તમે તમારા ડુપ્લિકેટ પાન કાર્ડને સરેન્ડર કરવા માટે NSDL અથવા UTIITSL જેવા PAN સેવા પ્રદાતાઓ પાસે જરૂરી ફોર્મ ફાઇલ કરી શકો છો. પરંતુ ડુપ્લિકેટ પાન કાર્ડ સરેન્ડર કરતા પહેલા, એ મહત્વનું છે કે તમારું માન્ય PAN આધાર સાથે લિંક થયેલું હોય અને બેંક ખાતાઓ, રોકાણો અને ટેક્સ ફાઇલિંગ સહિત તમામ નાણાકીય રેકોર્ડ્સમાં અપડેટ કરવામાં આવે.

આ પણ વાંચો - RBI વિશ્વમાં બન્યું નંબર વન, ઓક્ટોબરમાં સૌથી વધુ સોનું ખરીદીને આ દેશોને છોડી દીધો પાછળ