દીકરીના ભવિષ્ય માટે 2026માં કેવું હોવું જોઈએ ફાઇનાન્સિયલ પ્લાનિંગ? માત્ર એક સ્કીમ પર ભરોસો ન કરો, જાણો બેસ્ટ રીત

Financial planning for daughter: આજના સમયમાં દરેક માતા-પિતા પોતાની દીકરીના ભવિષ્યને લઈને ચિંતિત હોય છે. જો તમે પણ વર્ષ 2026માં તમારી દીકરીના આર્થિક ભવિષ્યનું પ્લાનિંગ કરી રહ્યા છો, તો તમારે તમારી વિચારસરણી થોડી બદલવી પડશે. હવે માત્ર કોઈ એક સ્કીમ કે પ્રોડક્ટમાં પૈસા રોકી દેવા પૂરતા નથી. આજનો ટ્રેન્ડ બદલાઈ રહ્યો છે અને હવે માત્ર પૈસા ભેગા કરવાના બદલે એક એવો ઇન્વેસ્ટમેન્ટ પોર્ટફોલિયો બનાવવો જરૂરી છે, જે દીકરીના શિક્ષણ, કરિયર અને તેની લાંબા ગાળાની આત્મનિર્ભરતા માટે કામ આવી શકે.

તો ચાલો જાણીએ કે દીકરી માટે બેસ્ટ ફાઇનાન્સિયલ પ્લાનિંગ કેવી રીતે કરવું જોઈએ.

માત્ર એક સ્કીમ પર આધાર રાખવો કેમ યોગ્ય નથી?

સામાન્ય રીતે આપણે સૌથી સુરક્ષિત રોકાણ પસંદ કરીએ છીએ. આ માટે ‘સુકન્યા સમૃદ્ધિ યોજના' (SSY) જેવી સરકારી સ્કીમો આજે પણ ટેક્સ બચાવવા અને ગેરંટેડ રિટર્ન માટે બેસ્ટ છે. પરંતુ તેનો સૌથી મોટો માઈનસ પોઈન્ટ તેનો ‘લોક-ઇન પિરિયડ' (Locking Period) છે. આ સ્કીમમાં તમારા પૈસા લાંબા સમય સુધી બ્લોક થઈ જાય છે. ઘણી વખત દીકરીના ઉચ્ચ શિક્ષણ કે અન્ય ઇમરજન્સી માટે સમય પહેલાં પૈસાની જરૂર પડે, ત્યારે આ સ્કીમમાં રોકેલા પૈસા તરત કામ આવતા નથી. આ જ કારણ છે કે આજના ફાઇનાન્સિયલ એક્સપર્ટ્સ સલાહ આપે છે કે સુકન્યા સમૃદ્ધિ યોજનાને તમારા રોકાણનો એક હિસ્સો બનાવો, પરંતુ બધો જ આધાર તેના પર ન રાખો.

ઉચ્ચ શિક્ષણ પાછળનો વધતો ખર્ચ અને મ્યુચ્યુઅલ ફંડ

દીકરીના ભવિષ્યમાં સૌથી મોટો ખર્ચ તેના ઉચ્ચ શિક્ષણનો હોય છે. પછી ભલે તે ભારતમાં ભણે કે વિદેશમાં, ફીમાં જમીન-આસમાનનો તફાવત આવી શકે છે. આજે પ્રાઇવેટ કોલેજો અને વિદેશી ડિગ્રીઓનો ખર્ચ રોકેટ ગતિએ વધી રહ્યો છે. આવી સ્થિતિમાં માત્ર ફિક્સ રિટર્ન આપતી સ્કીમો મોંઘવારીને હરાવી શકશે નહીં.

આ માટે મ્યુચ્યુઅલ ફંડ એક શાનદાર વિકલ્પ છે. લાંબા ગાળે મોંઘવારીને માત આપવા માટે SIP (સિસ્ટમેટિક ઇન્વેસ્ટમેન્ટ પ્લાન) દ્વારા ઇક્વિટી મ્યુચ્યુઅલ ફંડમાં રોકાણ કરવું ખૂબ ફાયદાકારક સાબિત થઈ શકે છે.