Union Budget 2026: ભારતના કરોડો ટેક્સપેયર્સની નજર હવે આગામી Union Budget 2026 પર ટકેલી છે. નાણામંત્રી નિર્મલા સીતારમણ 1 ફેબ્રુઆરી, 2026ના રોજ સંસદમાં બજેટ રજૂ કરે તેવી પૂરી શક્યતાઓ છે. જોકે, સરકાર દ્વારા હજુ સુધી સત્તાવાર તારીખ જાહેર કરવામાં આવી નથી, પરંતુ પરંપરા મુજબ ફેબ્રુઆરીની પહેલી તારીખે જ બજેટ આવતું હોય છે.
Union Budget 2026: હોમ લોન પર ટેક્સમાં છૂટ અને સ્ટાન્ડર્ડ ડિડક્શનમાં વધારો? જાણો નિર્મલા સીતારમણના બજેટ પાસે શું છે આશાઓ
Union Budget 2026: નાણામંત્રી નિર્મલા સીતારમણ 1 ફેબ્રુઆરી 2026ના રોજ બજેટ રજૂ કરે તેવી શક્યતા છે. હોમ લોન પર ટેક્સ છૂટ અને સ્ટાન્ડર્ડ ડિડક્શન વધારવા સહિત ટેક્સપેયર્સને આ બજેટ પાસેથી ઘણી આશાઓ છે. વાંચો વિગતે.
MoneyControl Newsઅપડેટેડ Jan 06, 2026 પર 6:58 PM
ગયા વર્ષે ટેક્સમાં મળેલી રાહતો બાદ, આ વર્ષે નોકરિયાત વર્ગ અને ઘર ખરીદનારાઓની અપેક્ષાઓ વધી ગઈ છે. આવો જાણીએ, આ વખતે ટેક્સપેયર્સ સરકાર પાસે કઈ કઈ મોટી ભેટની આશા રાખી રહ્યા છે.
હોમ લોન પર ટેક્સ બેનિફિટ વધવાની આશા
છેલ્લા કેટલાય સમયથી સરકાર New Tax Regimeને પ્રોત્સાહન આપી રહી છે, તેમ છતાં આજે પણ મોટી સંખ્યામાં લોકો Old Tax Regime (જૂની કર વ્યવસ્થા) પસંદ કરી રહ્યા છે. તેનું સૌથી મોટું કારણ છે હોમ લોન (Home Loan). જે લોકોએ ઘર ખરીદવા માટે લોન લીધી છે, તેમને જૂની વ્યવસ્થામાં વધારે ફાયદો દેખાય છે.
સેક્શન 24B: હાલમાં હોમ લોનના વ્યાજ પર 2 લાખ રૂપિયા સુધીની ટેક્સ છૂટ મળે છે. ટેક્સપેયર્સની માંગ છે કે મોંઘવારી અને પ્રોપર્ટીના ભાવ વધવાને કારણે આ લિમિટ વધારીને ઓછામાં ઓછી 3 લાખ રૂપિયા કરવામાં આવે.
સેક્શન 80C: હોમ લોનની મુદ્દલ (Principal) રકમ પર સેક્શન 80C હેઠળ કપાત મળે છે, જેની મર્યાદા હાલ 1.5 લાખ છે. આ લિમિટ પણ વધારવામાં આવે તેવી પ્રબળ શક્યતા છે.
નવી ટેક્સ રિજીમમાં પણ મળી શકે છે ડિડક્શન
સરકાર સતત નવી ટેક્સ રિજીમને આકર્ષક બનાવવાનો પ્રયાસ કરી રહી છે. ગયા બજેટમાં સરકારે 12 લાખ સુધીની આવકને અમુક શરતો સાથે ટેક્સ-ફ્રી બનાવી હતી. નવી રિજીમમાં ટેક્સના રેટ્સ ઓછા છે, પરંતુ તેમાં જૂની રિજીમ જેવા ડિડક્શન મળતા નથી.
આ વખતે એવી ચર્ચા છે કે નવી ટેક્સ રિજીમને વધુ લોકપ્રિય બનાવવા માટે સરકાર તેમાં ટર્મ લાઈફ ઈન્સ્યોરન્સ અને હેલ્થ ઈન્સ્યોરન્સ પર ડિડક્શનની છૂટ આપી શકે છે. જો આમ થશે તો મધ્યમ વર્ગને મોટો ફાયદો થશે.
નોકરિયાત વર્ગ માટે સ્ટાન્ડર્ડ ડિડક્શનમાં વધારો?
પગારદાર વર્ગ માટે સૌથી મહત્વનો મુદ્દો છે Standard Deduction. સરકારે નવી ટેક્સ રિજીમમાં સ્ટાન્ડર્ડ ડિડક્શનની મર્યાદા વધારીને 75 હજાર કરી હતી, પરંતુ જૂની રિજીમમાં તે હજુ પણ 50 હજાર રૂપિયા જ છે. વધતી મોંઘવારીને ધ્યાનમાં રાખીને, ટેક્સપેયર્સ ઈચ્છે છે કે નાણામંત્રી ઓલ્ડ રિજીમમાં પણ સ્ટાન્ડર્ડ ડિડક્શન વધારીને 75 હજાર રૂપિયા કે તેથી વધુ કરે. આનો સીધો લાભ સરકારી અને પ્રાઈવેટ સેક્ટરમાં કામ કરતા કર્મચારીઓને મળશે.
બેઝિક ટેક્સ છૂટની મર્યાદા વધી શકે છે
નવી કર વ્યવસ્થા હેઠળ હાલમાં બેઝિક ટેક્સ એક્ઝેમ્પશન લિમિટ 3 લાખ રૂપિયા છે. એટલે કે 3 લાખ સુધીની આવક પર કોઈ ટેક્સ લાગતો નથી. એક્સપર્ટ્સનું માનવું છે કે સરકાર આ લિમિટ વધારીને 5 લાખ રૂપિયા કરી શકે છે.
જો આ નિર્ણય લેવામાં આવે તો, વાર્ષિક 5 લાખ રૂપિયા સુધીની કમાણી કરનારા લોકોને ટેક્સ રિટર્ન ભરવાની કે ટેક્સ ચૂકવવાની ચિંતા રહેશે નહીં. સરકારના આ પગલાંથી ઓછી આવક ધરાવતા વર્ગને મોટી રાહત મળશે અને ટેક્સ ભરનારાઓની સંખ્યામાં પણ વધારો થઈ શકે છે.
હવે જોવું રહ્યું કે 1 ફેબ્રુઆરીએ ખુલનારા બજેટના પિટારામાંથી સામાન્ય માણસ માટે શું નીકળે છે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.