સરકાર લાવી રહી છે 22,919 કરોડ રૂપિયાની ઇલેક્ટ્રોનિક્સ કમ્પોનન્ટ મેન્યુફેક્ચરિંગ સ્કીમ, 91,000 લોકોને મળશે રોજગાર

સરકારે ઇલેક્ટ્રોનિક્સ કમ્પોનન્ટ મેન્યુફેક્ચરિંગમાં ભારતને આત્મનિર્ભર બનાવવા, આ ક્ષેત્રમાં મોટું રોકાણ આકર્ષવા અને રોજગારની તકો ઊભી કરવા માટે 22,919 કરોડ રૂપિયાના પ્લાનને મંજૂરી આપી છે. આ દેશની પ્રથમ એવી યોજના છે જે નિષ્ક્રિય ઇલેક્ટ્રોનિક ઘટકોના ઉત્પાદનને પ્રોત્સાહન આપવા પર કેન્દ્રિત છે. કેન્દ્રીય મંત્રીમંડળે ‘ઇલેક્ટ્રોનિક્સ કમ્પોનન્ટ મેન્યુફેક્ચરિંગ સ્કીમ’ને મંજૂરી આપી, જેનો હેતુ ગ્લોબલ અને લોકલ ઇન્વેસ્ટને આકર્ષીને ઇલેક્ટ્રોનિક્સ કમ્પોનન્ટ મેન્યુફેક્ચરિંગ પરિવેશમાં મજબૂત સપ્લાય ચેઇન વિકસાવવાનો છે. આ પહેલથી ક્ષમતા અને યોગ્યતા વિકાસ થશે અને ભારતીય કંપનીઓને ગ્લોબલ સપ્લાય ચેઇન (GVC) સાથે જોડીને ઘરેલું મૂલ્યવર્ધન (DVA)માં પણ વધારો થવાની આશા છે.

ઇલેક્ટ્રોનિક ઉત્પાદનોનું ઘરેલું પ્રોડક્શન વધ્યું

ઇલેક્ટ્રોનિક ઉત્પાદનોનું ઘરેલું પ્રોડક્શન નાણાકીય વર્ષ 2014-15માં 1.90 લાખ કરોડ રૂપિયાથી વધીને નાણાકીય વર્ષ 2023-24માં 9.52 લાખ કરોડ રૂપિયા થયું છે. આ વાર્ષિક 17 ટકાથી વધુનો ગ્રોથ રેટ દર્શાવે છે. વડાપ્રધાન નરેન્દ્ર મોદીની અધ્યક્ષતામાં યોજાયેલી મંત્રીમંડળની બેઠકમાં લેવાયેલા આ નિર્ણયની માહિતી ઇલેક્ટ્રોનિક્સ અને માહિતી ટેકનોલોજી મંત્રી અશ્વિની વૈષ્ણવે આપી. વૈષ્ણવે પત્રકારોને જણાવ્યું, “ઇલેક્ટ્રોનિક્સ કમ્પોનન્ટ મેન્યુફેક્ચરિંગ સ્કીમ હેઠળ નિષ્ક્રિય ઘટકોને મંજૂરી આપવામાં આવી છે. તેનું કુલ પેકેજ 22,919 કરોડ રૂપિયાનું છે અને તે છ વર્ષમાં પૂર્ણ થશે.”

91,600 લોકો માટે સીધી નોકરીઓ ઊભી થશે

તેમણે જણાવ્યું કે આ યોજનાથી 91,600 લોકો માટે સીધી નોકરીઓ ઊભી થશે અને લગભગ 59,350 કરોડ રૂપિયાનું રોકાણ આકર્ષિત થશે. વૈષ્ણવે કહ્યું કે આ સેગમેન્ટ દૂરસંચાર, ગ્રાહક ઇલેક્ટ્રોનિક્સ, ઓટોમોબાઇલ, તબીબી ઉપકરણો, પાવર સેક્ટર જેવા અનેક ક્ષેત્રોની જરૂરિયાતો પૂરી કરશે. કેન્દ્રીય મંત્રીએ જણાવ્યું કે આ યોજનાથી 4.56 લાખ કરોડ રૂપિયાનું ઉત્પાદન થવાની અપેક્ષા છે. આ ઉપરાંત, એક સત્તાવાર નિવેદન મુજબ, ઇલેક્ટ્રોનિક્સ કમ્પોનન્ટ મેન્યુફેક્ચરિંગ સ્કીમ ભારતીય ઉત્પાદકોને વિવિધ શ્રેણીઓ અને સેગમેન્ટ્સના ઘટકો સાથે જોડાયેલી ખામીઓ દૂર કરવા માટે અલગ-અલગ પ્રોત્સાહનો આપે છે. તેના લક્ષિત સેગમેન્ટ્સમાં ડિસ્પ્લે મોડ્યૂલ અને કેમેરા મોડ્યૂલ, મલ્ટી-લેયર પ્રિન્ટેડ સર્કિટ બોર્ડ (PCB), લિથિયમ-આયન બેટરી અને મોબાઇલ, આઇટી હાર્ડવેર ઉત્પાદનો તેમજ સંબંધિત ઉપકરણોના જોડાણોનો સમાવેશ થાય છે. તેમને વ્યવસાય સાથે જોડાયેલી પ્રોત્સાહન રકમ આપવામાં આવશે. પ્રોત્સાહનનો એક હિસ્સો રોજગાર લક્ષ્ય હાંસલ કરવા સાથે પણ જોડાયેલો છે. આ ઉપરાંત, ઇલેક્ટ્રોનિક્સ ઉત્પાદનમાં વપરાતા ઘટકો અને મૂડીગત માલને મૂડીગત ખર્ચ માટે પ્રોત્સાહન આપવામાં આવશે. ઇલેક્ટ્રોનિક્સ ઉત્પાદનોની નિકાસ નાણાકીય વર્ષ 2014-15માં 0.38 લાખ કરોડ રૂપિયાથી વધીને નાણાકીય વર્ષ 2023-24માં 2.41 લાખ કરોડ રૂપિયા થઈ છે, જે વાર્ષિક 20 ટકાનો ગ્રોથ દર્શાવે છે.

આ પણ વાંચો- અમેરિકી રાષ્ટ્રપતિ ટ્રમ્પના સૂર બદલાયા, કહ્યું- મોદી મારા ખૂબ સારા મિત્ર, ટ્રેડ ડીલ અંગે આપ્યા આ સંકેત