શું સોનું ખરીદવાનો આ સમય યોગ્ય છે? 4 મહિનામાં 25% રિટર્ન, જાણો શું કહે છે નિષ્ણાતો

નિષ્ણાતોના મંતવ્યો અલગ-અલગ છે, પરંતુ તેઓ સોનાના લાંબા ગાળાના રોકાણની સંભાવનાઓને લઈને પોઝિટિવ છે. એક જાણીતી નાણાકીય સંસ્થાના વિશ્લેષક નવનીત દમાણીનું કહેવું છે, "અસ્થિર વૈશ્વિક પરિસ્થિતિમાં સોનું એક મજબૂત રોકાણનો ઓપ્શન છે. કેન્દ્રીય બેન્કો અને રોકાણકારોની સતત માંગને કારણે સોનાની કિંમતોને ટેકો મળી રહ્યો છે. અમે ભલામણ કરીએ છીએ કે રોકાણકારો બજારમાં ઘટાડો થાય ત્યારે ખરીદી કરે, જેને 'બાય ઓન ડીપ' સ્ટ્રેટેજી કહેવાય છે."

બીજી બાજુ, કોમોડિટી બજારના નિષ્ણાત એન.એસ. રામસ્વામીનું માનવું છે કે હાલના ઊંચા ભાવે સોનું ખરીદવું જોખમી હોઈ શકે. તેમના મતે, "સોનાની કિંમતો હાલ ખૂબ ઊંચા સ્તરે છે, અને ટૂંકા ગાળામાં નફો બુક કરવાની શક્યતાઓ વધુ છે. રોકાણકારોએ ભાવમાં ઘટાડો થાય ત્યારે ખરીદીની તકનો લાભ લેવો જોઈએ."

શું કરવું જોઈએ?

ગ્લોબલ માર્કેટના વ્યૂહરચનાકાર રોસ મેક્સવેલનું સૂચન છે કે રોકાણકારોએ ટુકડે-ટુકડે ખરીદી કરવી જોઈએ. તેમનું કહેવું છે, "ઊંચા ભાવે એકસાથે મોટું રોકાણ કરવું જોખમી હોઈ શકે છે. જો તમે લાંબા ગાળાની સંપત્તિની સુરક્ષા અથવા આર્થિક અનિશ્ચિતતાઓ સામે રક્ષણ ઇચ્છતા હો, તો નાના-નાના હપ્તામાં સોનું ખરીદવું વધુ સારું છે."

શું છે ઉપાય?

લાંબા ગાળાનું રોકાણ: જો તમે સોનાને લાંબા ગાળાના રોકાણ તરીકે જોતા હો, તો બજારમાં ઘટાડો થાય ત્યારે ખરીદી કરવી ફાયદાકારક રહેશે.

ટુકડે-ટુકડે ખરીદી: એકસાથે મોટું રોકાણ કરવાને બદલે, નાના-નાના ભાગોમાં ખરીદી કરો, જેથી ભાવમાં ઘટાડો થાય તો નુકસાન ઓછું થાય.

નિષ્ણાતની સલાહ: રોકાણ પહેલાં નાણાકીય સલાહકારની મદદ લો, જેથી તમારા નાણાકીય લક્ષ્યો અને બજારની સ્થિતિને ધ્યાનમાં રાખીને નિર્ણય લઈ શકાય.

સોનું હાલમાં રોકાણકારોનું ધ્યાન આકર્ષી રહ્યું છે, પરંતુ હાલના ઊંચા ભાવે ખરીદી કરતા પહેલાં સાવચેતી રાખવી જરૂરી છે. નિષ્ણાતોની સલાહ અને બજારની સ્થિતિને ધ્યાનમાં રાખીને નાના હપ્તામાં ખરીદી કરવી એક સારો ઓપ્શન હોઈ શકે છે. સોનું લાંબા ગાળે સંપત્તિની સુરક્ષા આપે છે, પરંતુ સમજદારીથી રોકાણ કરવું મહત્વપૂર્ણ છે.

આ પણ વાંચો-વિશ્વમાં સફરજનનું ઉત્પાદનમાં કશ્મીરની ખ્યાતિ, પણ ભારતનું સ્થાન પાંચમું