ભારતીય પાયલટની શૌર્યગાથા: ચાકુ વાગવા છતાં સ્મિત મચ્છારે કોકપિટનો દરવાજો ખોલ્યો અને 174 લોકોના જીવ બચાવ્યા!

Captain Smit Machchhar: ફ્લાયદુબઈની દુબઈથી ઈઝરાયલના તેલ અવીવ જતી ફ્લાઈટમાં 30 સપ્ટેમ્બર, 2026 ના રોજ જે કંઈ થયું તે કોઈ ફિલ્મી સ્ટોરીથી કમ નહોતું. હવામાં 34,000 ફૂટની ઊંચાઈએ મોત સામે ઊભું હતું, પરંતુ ભારતીય પાયલટ કેપ્ટન સ્મિત મચ્છારે પોતાની અદભુત બહાદુરીથી વિમાનમાં સવાર 174 મુસાફરો અને ક્રૂ મેમ્બર્સના જીવ બચાવી લીધા.

અચાનક હજારો ફૂટ નીચે ખાબકવા લાગ્યું પ્લેન

Flydubaiનું બોઈંગ 737 MAX 8 પ્લેન (ફ્લાઈટ FZ1073) દુબઈથી ઊડ્યું હતું. લગભગ અઢી કલાક સુધી બધું જ સામાન્ય હતું. પરંતુ અચાનક કોકપિટમાં ઓમાનના કો-પાયલટે કેપ્ટન સ્મિત મચ્છાર પર ચાકુથી જીવલેણ હુમલો કરી દીધો. તેનો ઈરાદો પ્લેનને ક્રેશ કરવાનો કે મોટો આતંકી હુમલો કરવાનો હોવાની આશંકા છે. આ જીવલેણ ઝપાઝપી વચ્ચે પ્લેન ગણતરીની મિનિટોમાં જ 17,000 ફૂટ જેટલું નીચે ખાબક્યું, જેનાથી મુસાફરોમાં ભારે ગભરાટ ફેલાઈ ગયો હતો. ખતરો પારખીને પ્લેનમાંથી 7700 અને ત્યારબાદ હાઈજેકિંગની સ્થિતિ દર્શાવતો 7500 ઈમરજન્સી કોડ સિગ્નલ પણ આપવામાં આવ્યો હતો.

લોહીલુહાણ હાલતમાં ખોલ્યો કોકપિટનો દરવાજો

કો-પાયલટના અણધાર્યા હુમલામાં કેપ્ટન સ્મિત ગંભીર રીતે ઘાયલ થયા હતા અને લોહીથી લથબથ થઈને ફ્લોર પર પડી ગયા હતા. આમ છતાં, તેમણે હિંમત હારી નહીં. તેમણે પોતાની આખરી તાકાત ભેગી કરીને કોકપિટનો લોક થયેલો દરવાજો ખોલી નાખ્યો. તેમનો આ એક નિર્ણય પ્લેનમાં બેઠેલા તમામ લોકો માટે જીવતદાન સાબિત થયો.

મુસાફરોએ હુમલાવરને પકડ્યો અને પ્લેનનું કંટ્રોલ સંભાળ્યું

દરવાજો ખૂલતા જ યાનીવ હયુન જેવા કેટલાક બહાદુર ઈઝરાયલી મુસાફરો અને ક્રૂ મેમ્બર્સ કોકપિટની અંદર ધસી ગયા. તેમણે હુમલાખોર કો-પાયલટને પકડી લીધો અને તેને દોરડાથી બાંધી દીધો. આ જ પ્લેનમાં પેસેન્જર તરીકે મુસાફરી કરી રહેલા અન્ય રિઝર્વ પાયલટોએ તરત જ કંટ્રોલ સંભાળી લીધો અને પ્લેનને સંતુલિત કર્યું. ત્યારબાદ સાઉદી અરેબિયાના તબુક એરપોર્ટ પર પ્લેનનું સુરક્ષિત ઈમરજન્સી લેન્ડિંગ કરાવવામાં આવ્યું.